सर्किट कोर्टले टीपीएसबिरुद्ध फैसला गरे के हुन्छ ?
प्रकाशित मिति : भाद्र ३, २०७६ मंगलबार
क्यालिफोर्नियाको नाइन्थ सर्किट कोर्टमा टीपीएसबारेको मुद्दाको सुनुवाई गरिएको छ । अब सबैले मुद्दाबारे हुने फैसलाको व्यग्रताका साथ प्रतिक्षा गरिरहेका छन् ।
यदि सर्किट कोर्टले टीपीएस खारेज गर्ने फैसला गरेको खण्डमा र त्यो निर्णय अन्तिम रहेको खण्डमा टीपीएस खारेज गर्ने ट्रम्प प्रशासनको पुरानो निर्णय कार्यान्वयनमा आउनेछ । तर सम्बन्धित देशका नागरिकहरुलाई अमेरिका छाड्नका लागि १२० दिनको अवधि प्रदान गरिने अमेरिकी सरकारले जनाएको छ । अदालतको आदेशले टीपीएसको खारेजीमा केही प्रावधानहरु उल्लेख गरेमा भने त्यो प्रावधान अनुशार नै अगाडि बढ्नेछ ।
टीपीएस खारेज हुने फैसला हुने बित्तिकै १२० दिनको अवधि सुरु भने नहुने जनाइएको छ । कहिलेदेखि १२० दिनको अवधि सुरु हुने भन्ने सन्दर्भमा युएससीआईएसले सेवाग्राहीहरुलाई जानकारी गराउनेछ । उक्त संक्रमणकालिन अवधिमा टीपीएस सकिएका देशका नागरिकले अमेरिकामा रहने अन्य कानुनी बाटो नरोजेको भएमा वा बैध कानुनी अवस्था नरहेको खण्डमा अमेरिका छाड्नुपर्नेछ । उनीहरु अमेरिकाबाट देशनिकालाका लागि योग्य हुनेछन् ।
गत बुधबार झण्डै २ घण्टा लामो सुनुवाईका क्रममा दशौं हजार आप्रवासीको टीपीएस सुविधा खारेज गर्ने ट्रम्प प्रशासनको निर्णयका सन्दर्भमा तीनजना न्यायाधिसहरुको घम्साघम्सी परेको थियो ।
नाइन्थ सर्किट कोर्ट अफ अपिलले टीपीएस अन्त्य गर्ने ट्रम्प प्रशासनको निर्णयबिरुद्धका तर्कहरु सुनेको थियो । सुडान, एल साल्भाडोर, हैटी र निकारागुवाको टीपीएस अन्त्य गर्ने ट्रम्प प्रशासनको निर्णयका सन्दर्भमा अपिल कोर्टमा सुनुवाई भएपनि यसले नेपाल र होण्डुरसको सन्दर्भमा समेत प्रभाव पार्नेछ ।
ट्रम्प प्रशासनको निर्णय जातीवादबाट प्रेरित भएको सन्दर्भमा गरिएको तर्कमा न्यायाधिसहरु दुबिधामा परेका थिए । साथै नर्थ डिस्ट्रिक्ट अफ क्यालिफोर्नियाले जारी गरेको प्राथमिक आदे खारेज गरिएमा टीपीएसवाहकको अवस्था के हुने भन्नेबारे समेत प्रश्न गरिएको थियो ।
खासगरी बुधबारको सुनुवाईमा अदालतको प्राथमिक आदेश पुनरावेदन अदालतले खारेज गरिदिएमा कस्तो अवस्था आउने भन्नेबारे चासो व्यक्त गरिएको थियो । टीपीएस खारेज गर्ने सरकारी निर्णयबिरुद्ध मुद्दा दायर गरेका रामोसले प्राथमिक आदेश खारेज गरिएमा पनि आफूहरुले लडाई जारी राख्ने बताएकी थिइन् ।
क्रिस्टा रामोश अमेरिकी नागरिक हुन् । उनले टीपीएसबाट संरक्षित आफ्नी आमा र एल साल्भाडोर, हैटी, निकारागुवा र सुडानका दशौं हजार टीपीएस वाहकको देशनिकाला रोक्न टीपीएस अन्त्य गर्ने ट्रम्प प्रशासनको निर्णयबिरुद्ध अदालतमा मुद्दा दायर गरेकी छिन् ।
नाइन्थ सर्किट कोर्टका दुईजना न्यायाधिसहरु राष्ट्रपति जर्ज बुसले नियुक्त गरेकाहरु छन् । एकजना भने राष्ट्रपति बराक ओबामाले नियुक्त गरेका न्यायाधिस छन् ।