अमेरिकामा अध्यागमन छापामा ३५ पक्राउ, अपरेशन क्रस चेकमा समातिए ८९९
प्रकाशित मिति : श्रावण ७, २०७६ मंगलबार
हजारौंलाई देशनिकाला गर्ने भन्दै प्रचारित अध्यागमन छापमा अमेरिकामा जम्मा ३५ जना पक्राउ परेका छन् । पहिले नै देशनिकालाको आदेश पाइसकेका तर अमेरिका नछाडेका २ हजार परिवारलाई निशाना बनाएर सुरु गरिएको छापामा ३५ जना पक्राउ परेको मंगलबार जानकारी दिइयो ।
उनीहरुमध्ये १८ जना पहिले नै देशनिकालाको आदेश पाइसकेका परिवारका सदस्यहरु रहेको जनाइएको छ । अरु १७ जना भने आइसको छापाका क्रममा छानविन गर्दा कागजपत्रविहिन रहेको पाइएपछि पक्राउ गरिएको थियो ।
आइसले देशब्यापी रुपमा विभिन्न स्थानमा छापा मारिएको जनाएपनि कहाँ कहाँबाट उनीहरुलाई पक्राउ गरिएको हो भन्नेबारे केही बताएको छैन । आइसले आफ्नो अपरेशन जारी राख्ने जनाएको छ ।
अपरेशन क्रस चेक नामको अपरेशनका क्रममा देशनिकालाको आदेश पाइसकेका ८९९ जनालाई पक्राउ गरिएको आइसले जनाएको छ । यो अपरेशन मे १३ देखि जुलाई ११ सम्म संचालन गरिएको थियो । पक्राउ परेकाहरुमध्ये ६०५ जना विभिन्न अपराधमा दोषी ठहरिएकाहरु र ६३ जना विचाराधिन आपराधिक मुद्दा रहेकाहरु थिए ।