अध्यागमन छापामा गाडीको सिसा फुटाले, अनि तानेर बाहिर निकाले, भुईमा लडाएर पक्राउ गरे
प्रकाशित मिति : असार ३१, २०७६ मंगलबार
अमेरिकाको दक्षिणी मिनेपोलिसमा अमेरिकी अध्यागमन आइसका एजेन्टहरुले गाडीको सिसा फोडेर एकजना आप्रवासीलाई पक्राउ गरेका छन् । उनलाई गाडीको सिसा फोडेर बाहिर निकालेर नियन्त्रणमा लिएका हुन् ।
पोर्टल्याण्ड एभिन्यु साउथ र ४२ एभिन्युमा विहान ७ बजेर २० मिनेट जाँदा उनलाई पक्राउ गरिएको हो । ती आप्रवासीले आफ्नो अधिकारको प्रयोग गरेर गाडीको सिसा नखोलेपनि उनलाई जबर्जस्ती गाडीबाट निकालेर भुईमा लडाएर नियन्त्रणमा लिइएको छ ।
आइसले नियन्त्रणमा लिइएका व्यक्ति एल साल्भाडोरका ३८ बर्षीय पुरुष रहेको पुष्टी गरेको छ । ती व्यक्ति मिसडिमिनर अपराधका लागि सन् २००७ मा दोषी ठहरिएको र सन् २००९ मा देशनिकालाको आदेश पाइसकेका फरार अभियुक्त रहेको आइसले बताएको छ ।
आइसका एजेन्टको आदेश पालना नगरेका कारण उनलाई बलपूर्वक गाडीबाट निकालिएको आइसको दावी छ । अमेरिकामा देशनिकालाको आदेश पाइसकेका हजारौं कागजपत्रविहिनलाई नियन्त्रणमा लिनका लागि आइतबारदेखि आइसले विशेष अपरेशन सुरु गरेको छ ।
