लण्डनको ट्रेनमा राखिएको नेपाल भ्रमण बर्षको विज्ञापनमा थाइल्याण्डको फोटो !
लण्डनको ट्रेन स्टेशनमा नेपाल भ्रमण बर्ष २०२० को प्रचारमा केही विज्ञापनहरु राखिएको थियो, जसमा नेपाल झल्काउने केही पोष्टरहरु राखिएका थिए ।
पोष्टरहरुमा नेपालका हिमालहरु, मन्दिरहरु, भिक्षुहरु देखाइएको थियो । त्यतीसम्म त ठीकै छ । तर त्यसरी राखिएको एउटा पोष्टरमा थाइल्याण्डको फोटो देखाइएको छ । जसका सामाजिक संजालहरुमा चर्को विरोध भएको छ ।
पूर्व शेरामिक प्रशिक्षक समेत रहेका गेरी वार्नलले सामाजिक सञ्जालमा लेख्दै लण्डनको ट्रेन स्टेशनमा नेपालको प्रवद्र्धनका लागि राखिएका विज्ञापनमा थाइल्याण्डका बुद्धमूर्ति र भिक्षुहरु देखाइनु हास्यास्पद रहेको बताएका छन् ।
अर्का एकजनाले ट्वीट गर्दै नेपाल पर्यटन बर्ष २०२० को प्रचारमा थाइल्याण्डको तस्वीर प्रयोग गरिनु लज्जास्पद रहेको भन्दै आलोचना गरेका थिए । तर उनले पछि उक्त विज्ञापन हटाइएकोमा प्रशंसा समेत गरेका छन् ।
बेलायतका लागि नेपाली राजदूत दुर्गाबहादुर सुवेदीले विज्ञापनमा कसरी थाइल्याण्डको तस्वीर राखियो भन्नेबारे आफूलाई थाहा नभएको र यसबारे आफूहरुले पर्यटन बोर्डलाई स्पष्ट पार्न भनेको बताएका छन् ।
they really used a stock image of thailand to promote visit nepal 2020 — this is embarrassing. thank goodness they’ve a whole new branding team bc this is straight up humiliating. pic.twitter.com/9RKFZXyYIe
— sabrina (@sabrinamimosi) July 8, 2019
पर्यटन बोर्डले भने पोष्टरका लागि आफूहरु उत्तरदायी नभएको बताएको छ । नेपाल पर्यटन बोर्डका प्रमुख कार्यकारी अधिकृत दिपकराज जोशीले लण्डनमा गरिएको विज्ञापनमा आफूहरु संलग्न नरहेको बताएका छन् ।
विज्ञापनका पछाडि भ्रमण बर्ष २०२० को सचिवालय रहेको जोशीले बताएका छन् । उक्त सचिवालयको नेतृत्व सुरज बैद्यले गरेका छन् । लण्डनबाट एकजना डिजाइनरले फोटोहरु छानेर सचिवालयमा पठाएको र सचिवालयको स्वीकृतिपछि विज्ञापनमा राखिएको जनाइएको छ ।
सामाजिक सञ्जालमा चर्को विरोधपछि विज्ञापनमा राखिएको गलत तस्वीर परिवर्तन गरिएको छ ।
सबै तस्वीर जगन कार्कीको फेसबुकबाट ।
