एसपी कार्कीले हटाए प्रहरीमा जाहेरी/उजुरी दिँदा टिकट टाँस्नुपर्ने परम्परागत व्यवस्था
प्रकाशित मिति : असार २३, २०७६ सोमबार
जिल्ला प्रहरी कार्यालय कास्कीले आफू मातहतका सबै प्रहरी कार्यालयमा अब देखि कुनै पनि निवेदन बुझ्दा, उजुरी/जाहेरी लिँदा हुलाक टिकट आवश्यक नपर्ने गरी सूचना प्रदान गर्न परिपत्र गरेको छ ।
कार्यालयका प्रमुख एसपी दानबहादुर कार्कीले प्रहरीकहाँ पीडित पक्ष नै आउने भएकाले उनीहरुलाई दुःख हुने गरी हुलाक टिकट अनिवार्य नगर्न आदेश दिएका हुन् ।
कानुनी सेवा दिने भनेर बसेकाहरुले निवेदन र जाहेरी लेखेको मनपरी रकम लिने गरेको गुनासो सेवाग्राहीले गरिरहेका छन् । त्यसैमाथि १० रुपैंयाको टिकट भएपनि टाँस्नै पर्ने बाध्यता बनाउँदा समय र पैसाको नाश हुने एसपी कार्कीले बताए ।
‘हामीकहाँ आउने कोहि कोहि यति तिर्न सक्ने क्षमताका पनि हुँदैनन् । त्यसमाथि टिकट खोज्न भौतारिनुपर्ने ?’ एसपी कार्कीले भने – ‘चाहिने ठाउँमा अनिवार्य रहन्छ । तर, यहाँ निवेदन, उजुरी जाहेरीमा यो आवश्यक छैन भनेरै आफू अन्तर्गतका सबै कार्यालयहरुमा परिपत्र गरेको छु ।’
उनले प्रहरी कार्यालयमा आउँदा टिकट नटाँसी आउन सबैलाई आग्रह गरेका छन् ।
कार्कीले कास्कीको कमाण्ड सम्हालेपछि प्रहरीको आचरण सुधारमा विशेष ध्यान दिएका छन् । समुदायले चाहेको प्रहरी बनाउने अभियानमा आफू रहेको उनको भनाई छ ।
प्रहरीले ड्युटी गर्दा आदर गर्नुपर्ने, चेकजाँच कडा बनाउनुपर्ने, गलत कामकारबाही नगर्ने, हुन नदिनेतर्फ एसपीले सजगता अपनाएका छन् ।