मुख्यमन्त्री राई अमेरिका प्रस्थान, १ नम्बर प्रदेश सम्बद्धसँग जुलाई ७ मा न्युयोर्कमा अन्तरकृया
प्रकाशित मिति : असार १६, २०७६ सोमबार
प्रदेश नं १ का मुख्यमन्त्री शेरधन राई आज अमेरिका प्रस्थान गर्नुभएको छ । अमेरिकाको बाल्टिमोरमा यही जुलाई ५ देखि ७ सम्म हुन लागेको नेपाली राष्ट्रिय सम्मेलनको प्रमुख अतिथिका रुपमा मुख्यमन्त्री राई आज साँझ अमेरिका प्रस्थान गर्नुभएको उहाँका प्रेस सल्लाहकार ध्रुव सुवेदीले जानकारी दिनुभयो ।
प्रदेश सरकारको सिफारिस र सङ्घीय सरकारको स्वीकृति बमोजिम मुख्यमन्त्री राई अमेरिका प्रस्थान गर्नुभएको हो । अमेरिकाको उक्त कार्यक्रममा उहाँले गैरआवासीय नेपालीलाई सम्बोधन गर्ने कार्यक्रम छ । उक्त कार्यक्रममा उहाँले प्रदेश नं १ को विकास प्रक्रियाका बारेमा सम्बोधन गर्नुका साथै गैरआवासीय नेपालीहरुको भूमिकाको विषयमा समेत धारणा राख्नुहुनेछ ।
नीति कार्यक्रम र बजेटमा प्रदेश सरकारले लगानी सम्मेलन गर्ने जनाएको छ । उक्त लगानी सम्मेलनबारे पनि मुख्यमन्त्री राईले अमेरिकामा रहेका नेपालीहरुसँग छलफल गर्नुहुनेछ । यसअघि यो कार्यक्रममा भाग लिन नेपालका विशिष्ट व्यक्ति सहभागी भइसकेका छन् ।
सम्मेलनको आयोजना एशोसियशन अफ नेप्लिज इन दि अमेरिका, एशोसियशन अफ नेप्लिज इन मिड वेस्ट अमेरिका, अन्तर्राष्ट्रिय साहित्य समाज र बाल्टिमोर एशोसियशन अफ नेप्लिज इन अमेरिकाले संयुक्त रुपमा गरेका हुन् ।
बाल्टिमोरको कार्यक्रमपछि जुलाई ७ मा न्युयोर्कमा नेपालीहरुसँग अन्तरकृया कार्यक्रम गर्ने तय भएको छ । नेपाली महावाणिज्यदूतावास न्युयोर्कको आयोजनामा हुने उक्त कार्यक्रममा सहभागिताका लागि अनुरोध समेत गरिएको छ ।
खासगरी प्रदेश नम्बर १ बाट अमेरिकाको न्युयोर्क र आसपासका क्षेत्रमा आइ बसोबास गर्नेहरुलाई केन्द्रीत गरेर न्युयोर्कमा अन्तरकृया कार्यक्रम गर्न लागिएको प्रवासी नेपाली मञ्च अमेरिकाका महासचिव राधाकृष्ण देउजाले जानकारी दिनुभयो ।
आफ्नो प्रदेशबाट विदेशका बिभिन्न ठाउँमा रहनु भएका नागरिकहरुलाइ के कसरी अपनत्व महशुस गराउन सकिन्छ ? के कस्ता अधिकार र अवसरहरु दिन सकिन्छ ? प्रवासमा बसेका एक नम्बर प्रदेशका नागरिकहरुबाट प्रदेश नम्बर एकले के कस्ता सहयोग पाउन सक्छ ? भन्ने विषयमा छलफल गर्नु मुख्यमन्त्रीको एक मात्रै लक्ष्य रहेको राजनीतिक रुपमा उहाँको दल निकट देउजाले बताउनु भयो ।