भर्जिनियामा सामुदायिक भवन निर्माणको सपना साकार बन्दै,नेपालीलाई एउटा सूत्रमा वाध्ने प्रयत्न 


प्रकाशित मिति : असार १५, २०७६ आईतबार

– ह्यारी भण्डारी

आदरणीय भर्जिनियावासी दाजुभाई दिदीवहिनी तथा बुबा आमा र भावी सन्तति तपाईहरुको अहोरात्रको खटाई ,सामूहिक भावना र मनकारी दानको कारणले आज सम्पन्न हुन गईरहेको साता व्यापी लामो पुराण कार्यक्रम अन्र्तगत शनिवार उपस्थित भएर केही कुरा राख्ने मौका प्रदान गर्नुभएको मा हार्दिक धन्यवाद ज्ञापन गर्न चाहन्छु ।

नेपाली अमेरिकन डायस्पोराको छोटो ईतिहास भएकाले यसलाई दिगो रुपमा विकसित गर्दे अमेरिकाको मूलधारको प्रक्रियामा समाहित गराउनु नै हामीहरुको मुख्य चुनौती रहेको छ । यसको लागि सानो भएपनि भर्जिनियावासीहरुको प्रयास र प्रयत्नले सामुदायिक भवन निर्माणको सपनाले साकार रुप ग्रहण गर्न लाग्दैछ । यसले हामीहरुकोे भावी सन्ततिका लागि हामीहरुको पहिचान,हाम्रा भावना र ईतिहासको समेत जगेर्ना गर्दे समुदायको वृहत्तर हीतको लागि सामुदायिक केन्द्रको माध्यमवाट सन्देश दिन सकियोस भन्ने कामना गर्दछु ।

अरु धेरै आप्रवासीहरुको कथा जस्तै नेपाली आप्रवासीका कथापनि फरक छैंनन, प्रारम्भिक चरणका संघर्षका कथाहरु र भावी पिढीको सुन्दर भविष्य निर्माण गर्न खेल्नु पर्ने भूमिका देखि आफनो कला,संस्कृति र भाषाको जगेर्ना गर्दे भावी पिढीलाई हस्तान्तरण गर्नुपर्ने हामीहरुको दायित्व रहेको छ । यसको लागि सामुदायिक केन्द्रको स्थापना,सञ्चालन र निरन्तरताको लागि पनि पनि उत्तिकै ऐक्यवद्धताका साथ लागिपर्नुहुन यसका अभियन्ता, दाता र स्वयंसेवकहरु सवैलाई हार्दिक अनुरोध गर्दछु ।

मलाई के विश्वास रहेको छ भने हामी नेपालीहरु एक भएर कुनै कामको थालनी गरयौ भने त्यसलाई सफल पार्न सक्षम छौं, यसको एउटा उदाहरण भर्जिनियाको सामुदायिक भवनको निर्माणको लागि जुटेको मनकारी दाताहरुको मन र दानले पुष्टि गरेको छ । यसैगरी हामीहरुले अमेरिका भरि कुनै न कुनै अभियानमा सहभागी भएर यस्तै सहकार्यता र समन्वयको मार्फतबाट अन्य धेरै कामहरु सफल गर्न हातेमालो गर्न सकौं भन्ने मेरो भनाई रहेको छ ।

साथै अमेरिका भरि रहेका यस्ता सामुदायिक केन्द्रहरुले एक अर्कामा सहकार्य गर्दे उपलब्ध स्रोतहरुको अधिकतम उपयोग गर्न सदैव आफनो ढोका खुला राख्नुपर्छ भन्ने मेरो व्यक्तिगत मान्यता समेत रहेको स्पष्ट पार्न चाहन्छु । यसरी नै हाम्रो आवाजलाई वास्तविक रुपमा एकीकृत ढंगले वुलन्द पार्न सक्छौं ।

अन्त्यमा, म भन्ने भावनालाई त्यागेर हामी भन्ने भावना जागृत गर्दे नेपाली र नेपालीको वीच हातेमालो गरौं र प्रवासी भूमिमा हामीहरुको उपस्थितिलाई अझै व्यवस्थित तरिकाले अगाडि वढाऔं भन्दै पुन : सम्पूर्ण आयोजक टीमलाई हार्दिक आभार व्यक्त गर्न चाहन्छु ।

भण्डारी मेरिल्याण्ड जनरल एसेम्वली डेलिगेट हुनुहुन्छ । 

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com