अमेरिकामा एसाइलम खोज्नेले आफ्नै देशमा रहेको दूतावासमा आवेदन दिनुपर्ने बिल सदनमा
प्रकाशित मिति : असार १, २०७६ आईतबार
अमेरिकामा एसाइलम खोज्नेले आफ्नै देशमा रहेको अमेरिकी दूतावासमा आवेदन दिनुपर्ने प्रावधान सहितको विधेयक अमेरिकी संसदमा पेश भएको छ । सिनेटर लिन्ड्से ग्राहमले सिनेटमा पेश गरेको उक्त विधेयकमा एसाइलमको प्रकृयामा ब्यापक परिवर्तनको प्रस्ताव गरिएको छ ।
अमेरिकाको दक्षिणी सिमामा आएर नभई मेक्सिको वा सम्बन्धित देशमा रहेको कन्सुलेटमा एसाइलमको आवेदन दिनुपर्ने, कागजपत्रविहिन बालबालिकाहरुलाई २० दिनबाट बढाएर एकसयदिनसम्म जेलमा राख्न पाउने र अभिभावकविनाका बालबालिकाहरुलाई मध्य अमेरिकामा देशनिकाला गर्न सहज बनाउने विषय विधेयकमा छ । त्यस्तै अमेरिकी अध्यागमन अदालतको ब्याकलग हटाउन ५ सय अध्यागमन न्यायाधिसलाई आब्हान गर्ने विषय पनि विधेयकमा छ ।
अमेरिकामा ट्रम्प प्रशासनले लगातार एसाइलममाथि आक्रमण गरिरहेको बखत रिपब्लिकन सिनेटरले यस्तो बिल सिनेटमा ल्याएका हुन् । यद्यपी डेमोक्र्याट्सहरुको बहुमत रहेको प्रतिनिधिसभाबाट भने यो विधेयक पारितहुने सम्भावना देखिन्न ।
