विहिबार यस्तो अध्यागमन योजना सार्वजनिक गर्दैछन् ट्रम्पले
प्रकाशित मिति : असार १, २०७६ आईतबार
अमेरिकी राष्ट्रपति डोनाल्ड ट्रम्पले आगामी बिहिबार अध्यागमन सम्बन्धि विशेष योजना सार्वजनिक गर्ने भएका छन् । सिमा सुरक्षाको विषय र मेरिटमा आधारित अध्यागमन प्रणाली समेटिएको उक्त योजनाले अति दक्ष र उच्च शिक्षा हासिल गरेकाहरुलाई प्राथमिकता दिने जनाइएको छ ।
बुधबारमात्र सिनेटर लिन्ड्से ग्राहमले एसाइलमको प्रकृयालाई बदल्ने एउटा बिल सदनमा पेश गरेका थिए । ह्वाइट हाउसको प्रस्ताव कानुन बन्नका लागि डिजाइन नगरिएको भन्दै उनले सदनमा बिल पेश गरेका थिए ।
ह्वाइटहाउसको प्रस्तावका पछाडि राष्ट्रपतिका बरिष्ठ सल्लाहकार जारेड कुश्नेरले काम गरिरहेका छन् । विभिन्न ६ वटा उद्देश्यहरु सहित उक्त प्रस्ताव तयार गरिएको छ ।
सिमा सुरक्षा, अमेरिकी ज्यालाको संरक्षण, उच्च क्षमता भएका आप्रवासीहरुलाई आकर्षण, संकटग्रस्त उद्योगमा श्रम, नजिकका परिवारको आप्रवासन र मानवीय मुल्यको संरक्षण जस्ता विषयहरु प्रस्तावमा छन् । तर नयाँ प्रस्तावमा बाल्यकालमा अमेरिका आउने काजपत्रविहिनको विषय भने नसमेटिएको जनाइएको छ ।