कार्यकारी आदेशबाटै कागजपत्रविहिनलाई नागरिकताको बाटोमा लैजाने राष्ट्रपति उम्मेदवार कमलाको घोषणा

अमेरिकाको आगामी राष्ट्रपति चुनावका लागि डेमोक्रेटिक प्राइमरीकी उम्मेदवार कमला ह्यारिसले आफू राष्ट्रपतिमा निर्वाचित भएमा कार्यकारी आदेश जारी गरेर भएपनि बाल्यकालमा अमेरिका आएका कागजपत्रविहिनहरुलाई देशनिकालाको डरबाट मुक्त गरेर नागरिकताको बाटोमा लैजाने योजना अगाडि सारेकी छिन् । सिनेटर कमला ह्यारिसले बुधबार यस्तो योजनाको घोषणा गरेकी हुन् ।

देशनिकालाको त्रासमा बाँचिरहेका ड्रिमरहरुलाई अमेरिकामा आफ्नो भविश्य सुनिश्चिताका लागि योजना ल्याउने कमला ह्यारिसको घोषणा रहेको छ । राष्ट्रपतिमा निर्वाचित भएमा उनले संसदबाटै २१ औं शताब्दीको अध्यागमन सुधारका लागि लड्ने बताएकी छिन् । आफूले कुरेर नबसी कार्यकारी आदेशमार्फत नै ड्रिमरलाई अमेरिकामा कानुनी हैसियत खोज्नका लागि विद्यमान व्यवधान हटाउने उनको भनाई छ ।

गत अप्रिलमा पनि उनले राष्ट्रपतिमा निर्वाचित भएमा पहिलो एकसयदिनमा नै अध्यागमन सुधारका क्षेत्रमा राष्ट्रपतिय अधिकार प्रयोग गरेर काम गर्ने घोषणा गरेकी थिइन् । कमला ह्यारिस अमेरिकी राष्ट्रपतिको चुनावका लागि बलियो उम्मेदवार मानिन्छन् । तर उनले ट्रम्पसँग चुनाव लड्नका लागि डेमोक्रेटिक पार्टीको प्राइमरीमा विजय हासिल गर्नुपर्नेछ ।