कागजपत्रविहिन विद्यार्थीलाई देशनिकाला गर्न आग्रह गर्ने शिक्षिका निस्कासित
प्रकाशित मिति : जेष्ठ २२, २०७६ बुधबार
टेक्सासको हाइस्कुलकी एकजना शिक्षिकाले कागजपत्रविहिन विद्यार्थीलाई देशनिकाला गर्न आग्रह गर्दै ट्वीट गरेपनि उनलाई जागिरबाट निस्कासन गरिएको छ । अमेरिकी राष्ट्रपति डोनाल्ड ट्रम्पलाई ट्वीटरको इनबक्समा सन्देश पठाउन खोज्दा सार्वजनिक रुपमा नै ट्वीट भएपछि यो विषय बाहिर आएको हो ।
टेक्सासको फोर्ट वर्थमा रहेको विद्यालयमा पढाउने जर्जिया क्लार्कले आफूले पठाउने विद्यालय कागजपत्रविहिन विद्यार्थीहरुले भरिएको भन्दै विद्यार्थीलाई देशनिकाला गर्न आग्रह गरेकी थिइन् । आफूलाई त्यसक्षेत्रमा कागजपत्रविहिनबारे अनुसन्धान गर्ने अधिकारीको सम्पर्क चाहिएको भन्दै उनले ट्वीटरमा श्रृंखलाबद्ध ट्वीट गरेकी थिइन् । उनी फोर्ट वर्थको इन्डिपेन्डेन्ट स्कुल डिस्ट्रीक्टमा सन् १९९८ देखि आबद्ध रहदै आएकी थिइन् ।
स्कुलको बोर्डको बैठकमा उनको ट्वीटबारे कुरा उठेपछि उनलाई निस्कासन गर्नका लागि सबै सदस्यहरु एकमत भएका थिए । टेक्सासको राज्यको कानुन अनुशार उनले आफूलाई निस्कासन गरिएको निर्णयबिरुद्ध १५ दिनभित्र अपिल गर्न सक्नेछिन् ।
ट्वीटरमा लेखेकै दिन उनले विद्यालयमा विभेदपूर्ण अभिव्यक्ति दिएको विद्यार्थीहरुले आरोप लगाएका छन् । मेक्सिकनहरु गैरकानुनी रुपमा अमेरिका प्रवेश गर्न नहुने भन्दै उनले कक्षामा नै आक्रोश व्यक्त गरेकी थिइन् । विद्यार्थीहरु बाथरुम जान खोज्दा उनले अमेरिकामा कानुनी रुपमा बसेको कागजपत्र देखाउन भनेकी थिइन् ।