टीपीएसवाहकलाई नागरिकताको बाटोमा लैजाने बिल संसदको न्यायिक समितिबाट पारित
प्रकाशित मिति : जेष्ठ ९, २०७६ बिहीबार
बाल्यकालमा अमेरिका आएका कागपत्रविहिनहरु र टीपीएसवाहकलाई ग्रिनकार्डहुँदै नागरिकताको बाटोमा लैजाने विधयेक अमेरिकी प्रतिनिधिसभाको न्यायिक समितिबाट अगाडि बढेको छ । बुधबार संसदको न्यायिक समितिका डेमोक्र्याट्सहरुले विधयेक अगाडि बढाउने पक्षमा मतदान गरेका थिए ।
ड्रिम एक्टले बाल्यकालमा अमेरिका आएका झण्डै ३६ लाख कागजपत्रविहिनहरुलाई १० बर्षको ग्रिनकार्ड र ग्रिनकार्ड पाएको ५ बर्षपछि अमेरिकी नागरिकताको बाटोमा लैजान मार्गप्रसस्त गर्नेछ । झण्डै ८ लाख ड्रिमरहरुलाई डाकाले समेटेको छ ।
त्यस्तै प्रमिस एक्टले टीपीएसबाहकलाई ग्रिनकार्डको बाटोमा लैजान मार्गप्रसस्त गर्नेछ । यो विधयेक पारित भएमा झण्डै १० हजार नेपाली टीपीएसबाहकहरु प्रत्यक्ष लाभान्वित हुनसक्नेछन् ।
ड्रिम एक्टका पक्षमा न्यायायिक समितिमा १९ मत परेको थियो भने विपक्षमा १० मत परेको थियो । त्यस्तै प्रमिस एक्टका पक्षमा २० मत र विपक्षमा ९ मत परेको थियो ।
अब ती विधयेकहरु प्रतिनिधिसभाको पूर्ण बैठकमा मतदानका लागि ल्याइनेछ । प्रतिनिधिसभामा ती विधयेकहरुलाई अमेरिकन ड्रिम एण्ड प्रमिस एक्ट नामाकरण गरेर एकमुष्ठरुपमा ल्याइने जनाइएको छ ।