प्वाइन्टमा आधारित ग्रिनकार्डका लागि ट्रम्पको योजना सार्वजनिक
प्रकाशित मिति : जेष्ठ २, २०७६ बिहीबार
अमेरिकी राष्ट्रपति डोनाल्ड ट्रम्पले मेरिटमा आधारित अध्यागमन प्रणाली निर्माणका लागि आफ्नो बृहत योजना सार्वजनिक गरेका छन् । आज ह्वाइटहाउसको रोज गार्डेनमा दिएको मन्तब्यमार्फत उनले आफ्नो अध्यागमन योजना सार्वजनिक गरेका हुन् ।
आफूहरुले अमेरिकन कामदारलाई सुरक्षा, ज्याला र जागिरका लागि प्राथमिकता दिने योजना ल्याएको तथा आफूहरुको योजना आप्रवासीपरस्त, कामदारपरस्त र अमेरिकापरस्त रहेको ट्रम्पले बताएका छन् । ट्रम्पले अगाडि सारेको अध्यागमन योजनामा आप्रवासीहरुलाई प्वाइन्ट सिस्टमबाट क्षमताका आधारमा ग्रिनकार्ड प्रदान गर्ने विषय समावेश गरिएको छ ।
नयाँ योजनाले एसाइलम प्रणालीलाई पनि सुधार गर्नेछ । तर नयाँ योजनामा बाल्यकालमा अमेरिकामा आएका कागजपत्रविहिनहरु र टीपीएसको माताहतमा रहेका आप्रवासीहरुको विषयलाई भने समेटिएको छैन ।
ट्रम्पको यो अध्यागमन योजना तयार पार्नका लागि उनका प्रमुख सल्लाहकार तथा ज्वाई जारेड कुश्नेरले मुख्य पहल गरेका थिए । यो योजनालाई ट्रम्पको आगामी कार्यकालका लागि चुनावी एजेण्डाका रुपमा समेत ब्याख्या गरिएको छ ।
अहिले अमेरिकामा झण्डै १२ प्रतिशत आप्रवासीहरुलेमात्र क्षमताका आधारमा ग्रिनकार्ड प्राप्त गर्दै आएका छन् । अरु ६६ प्रतिशतले परिवारमा आधारित ग्रिनकार्ड प्राप्त गर्दै आएका छन् । एसाइलम लगायत मानवीय आधारमा २२ प्रतिशतले ग्रिनकार्ड पाउदै आएका छन् ।
त्यसलाई परिवर्तन गरेर ट्रम्पले ५७ प्रतिशत क्षमतामा आधारित र ३३ प्रतिशत परिवारमा आधारित बनाउन खोजेका छन् । १० प्रतिशतमात्र ग्रिनकार्ड एसाइलम लगायतका मानवीय आधारमा जारी गर्न खोजेका छन् ।
यो योजना कार्यान्वयन भएमा अमेरिकामा रहेका नेपालीहरुलाई पनि ठूलो असर गर्नेछ ।