नेपालको टीपीएस ९ महिनाका लागि स्वत लम्बियो, वर्क परमिट २०२० को मार्च २४ सम्म कायम
प्रकाशित मिति : बैशाख २७, २०७६ शुक्रबार
नेपालको टीपीएस र त्यसबारेका सम्पूर्ण कागजात जुन २४ पछि ९ महिनाका लागि स्वत लम्बिएको युएससीआइएसले जनाएको छ । युएससीआईएसले आज फेडरल रजिस्टरमा सुचना प्रकाशित गर्दै नेपालीको टीपीएस र त्यसबारेका सबै कागजातको अवधि सन् २०२० को मार्च २४ सम्मका लागि स्वत लम्बिएको जनाएको छ ।
वर्क परमिटका लागि आवेदन दिएका तर प्राप्त गरिनसकेका नेपाली टीपीएसवाहकहरुले मार्च २४, २०२० सम्मको म्याद भएको वर्क परमिट नै प्राप्त गर्ने युएससीआईएसले जनाएको छ । युएससीआईएसले टीपीएस वाहक नेपालीको आई ९४ वनि मार्च २४, २०२० सम्मका लागि स्वत थप्ने भएको छ ।
टीपीएस फिर्ता लिएका वा रि रजिस्ट्रेशन नगरेकाहरुको सन्दर्भमा भने उनीहरुको टीपीएस नलम्बिने युएससीआईएसले जनाएको छ । तर बीचमा रि रजिस्ट्रेशन गर्न छुटाएकाहरुले भने बिलम्ब हुनुको कारण खुलाएर रि रजिस्ट्रेशनका लागि आवेदन दिन सक्नेछन् ।
हाल टीपीएसमा रहेका नेपालीहरुले अहिले कुनै पनि शुल्क तिर्नु नपर्ने र कुनै पनि आवेदन दिनु नपर्ने बरु उनीहरुको टीपीएस स्वत लम्बिने भएको छ । युएससीआईएसले भनेको छ – ‘जसले रि रजिस्ट्रेशनको अवधिको बेलामा रि रजिस्ट्रेशन नगरेकाहरुले अहिले पनि फर्म आई ८२१ भरेर आवेदन दिनसक्नेछन् । तर उनीहरुले तोकिएको अवधिमा रि रजिस्ट्रेशन गर्न नसक्नुको उचित कारण खुलाउनुपर्नेछ ।’