न्युयोर्कमा नेपाली उबर चालकमाथि आक्रमण, उबरले दिन मानेन आक्रमण गर्नेको विवरण
प्रकाशित मिति : बैशाख २२, २०७६ आईतबार
न्युयोर्कमा नेपाली उबर चालकमाथि आक्रमण भएको छ । न्युयोर्क निवासी ललितपुर चापागाउँका २२ बर्षीय सुसन थापामाथि शनिबार दिउसो ३ बजेर १५ मिनेट जाँदा एकजना महिलाले आक्रमण गरेकी हुन् ।
लङ आइल्याण्ड सिटीको २१ स्ट्रीट, ३४ र ३३ एभिन्युको बीचमा अन्दाजी ४० बर्षको हिस्पानिक महिलाले आफूमाथि आक्रमण गरेको थापाले बताएका छन् । आक्रमणपछि आफू केहीबेर बेहोस भएको र पछि प्रहरीलाई फोन गर्दा समेत प्रहरी २ घण्टा ढिलो आएको थापाले बताए ।
थापाका अनुशार सुरुमा ती महिलाले उबर पुल रिक्वेस्ट गरेकी थिइन् । उनले दिएको ठेगानामा पुगेर केहीबेर कुर्दा समेत उनी नआएपछि थापाले रिक्वेस्ट रद्द गरेका थिए । केहीबेरपछि ती महिलाले दोश्रोपटक उबर पुल रिक्वेष्ट गरेकी थिइन् ।
थापाले भने –‘म त्यसपछि उनलाई पिकअप गर्न उबरले दिएको गन्तब्यमा पुगें । तर त्यहाँ उनी थिइनन् । उनको फोन कल आएपछि मैले आफूले प्रतिक्षा गरेको लोकेशन बताएँ । तर उनले लोकेशन फेला नपारेको भन्दै अत्यन्तै आक्रोशित भएर गालीगलौज गरिन् ।’
‘त्यसपछि मैले उनको पुल रिक्वेस्ट रद्द गरें । लगत्तै उनी गाडी भएको स्थानमा आइन् । अनि जोडजोडसँग गाडीको सिसा र ढोकामा हानिन् । अनि ढोका समातेर तानिन् । पछाडि अरु यात्रीपनि थिए । उनी सिटमा बसेर आफूलाई म्यानहटन लैजान भनिन् । मैले उनको उबर रिक्वेस्ट रद्द भइसकेकाले लैजान नसक्ने बताएँ । तर उनले गाली गलौजसँगै ममाथि आक्रमण गरिन् ।’ घटनाबारे बताउँदै थापाले भने ।
‘उनले मेरो टाउकोमा मुक्का र प्रहार गरिन् । त्यसपछि म केहीबेर बेहोस भएछु । उनले मेरो आइप्याडपनि फोडिदिइन् । म होसमा आएपछि प्रहरीलाई फोन गरें । तर प्रहरी पनि झण्डै २ घण्टा ढिलोमात्र आयो ।’ थापाले खसोखासलाई बताए ।
आक्रमणपछि थापा उपचारका लागि क्वीन्सको माउन्ट साइनाई अस्पतालमा गएका थिए । शनिबार बेलुका उपचारपछि उनले अहिले घरमा नै आराम गरिरहेका छन् । आइतबार दिउसो आफूलाई पटकपटक बान्ता भएको थापाले बताएका छन् । आक्रमणका कारण उनको अनुशार सुन्निएको छ भने अनुहारमा चोट समेत लागेको छ ।
आक्रमण गर्ने महिलाको विवरणका लागि उनले उबरमा सम्पर्क गरेपनि उबरले भने विवरण दिन अस्वीकार गरेको छ । प्रहरी आइपुग्दासम्म ती आक्रमणकारी महिला त्यहाँबाट भागिसकेकी थिइन् ।