ओभरस्टे हुनेमाथि कारवाही गर्न ट्रम्पले गरे मेमोमा हस्ताक्षर
प्रकाशित मिति : बैशाख १०, २०७६ मंगलबार
अमेरिकामा विभिन्न गैरआप्रवासी भिसामा प्रवेश गरेर भिसा सकिएपछि पनि अमेरिका नछाड्नेहरुमाथि कारवाहीका लागि राष्ट्रपति डोनाल्य ट्रम्पले लडाईको नयाँ अध्याय सुरुवात गरेका छन् । सोमबार ट्रम्पले अमेरिकामा ओभरस्टे हुनेहरुमाथि कारवाहीका लागि आफ्नो प्रशासनलाई आदेश दिएका हुन् ।
सेक्रेटरी अफ स्टेट र सेक्रेटरी अफ होमल्याण्ड सेक्युरिटीलाई निर्देशनात्मक मेमोमा हस्ताक्षर गर्दै ट्रम्पले ओभरस्टेहुनेमाथि कारवाहीका लागि योजना पेश गर्न चारमहिनाको समयसिमा दिएका छन् । धेरै व्यक्ति ओभरस्टे हुनेदेशका नागरिकलाई भिसा नदिनेसम्मका योजनाहरु त्यसमा समावेश हुने जनाइएको छ ।
आर्थिकबर्ष सन् २०१६ देखि २०१७ सम्म अमेरिकामा एक दशमलव २ मिलियन विदेशीहरु ओभरस्टे भएको अमेरिकी सरकारको तथ्यांक रहेको छ । सन् २००६ मा पिउ रिसर्च सेन्टरले गरेको एउटा शोध अनुशार अमेरिकामा रहेका ११ मिलियन कागजपत्रविहिनमध्ये झण्डै ५० प्रतिशत विभिन्न भिसामा अमेरिका प्रवेश गरेका थिए ।
