श्रीलङ्का बिस्फोटः सरकारी लापरवाहीमाथि बढ्यो विवाद, हुनेछ अनुसन्धान
प्रकाशित मिति : बैशाख ९, २०७६ सोमबार
श्रीलङ्काका अधिकारीले आइतबार भएको श्रृङ्खलाबद्ध बम बिस्फोट कुनै अन्तरराष्ट्रिय नेटवर्कको मद्दतले गराइएको बताएका छन् ।
सरकारले यसका लागि एक स्थानीय जेहादी गुट – नेशनल तौहीद जमात – को नाम लिएको छ । यद्यपी अहिलेसम्म कसैले पनि हमलाको जिम्मेवारी लिएको छैन ।
यसैबीच श्रीलङ्काली राष्ट्रपति मैत्रीपाल सिरिसेनाले सोमबार मध्यरातदेखि संकटकालको घोषणा गरिएको जानकारी दिएका छन् ।
आइतबार कोलम्बोसमेत विभिन्न स्थानमा चर्च र होटलमा भएको आठ बम बिस्फोटमा २९० को मृत्यु भएको थियो भने लगभग पाँच सय घाइते भएका छन् ।
बढ्यो विवादः
यसैबीच हमलाबारे पहिले नै चेतावनी पाएपछि पनि सरकारको तर्फबाट कुनै ठोस् कदम नउठाएको आरोपमा श्रीलङ्कामा हंगामा मच्चिएको छ ।
राष्ट्रपति सिरिसेनाका सल्लाहकार शिराल लकथिलाकाले बीबीसीसँगको कुराकानीमा सरकारको तर्फबाट कुनै त्रुटि भए नभएको बारे अनुसन्धान हुने बताए ।
यसअघि श्रीलङ्काकाका एक वरिष्ठ मन्त्री रजित सेनारत्नले कोलोम्बोमा पत्रकारसँग अन्तरराष्ट्रिय गुप्तचर एजेन्सीले यस्तो हमलाको चेतावनी दिएको थियो तर यो सूचना प्रधानमन्त्री रनिल विक्रमसिंघेसम्म पुग्न नसकेको जानकारी दिएका थिए ।
मन्त्रीले यो हमला कुनै अन्तरराष्ट्रिय नेटवर्कको सहायता बिना पूरा गर्न असम्भव लाग्छ ।
पुलिसका अनुसार अहिलेसम्म २४ जनालाई पक्राउ गरिएको छ तरपनि हमलामा कसको हात छ भनेर पत्ता लाग्न सकेको छैन ।
मृतकमा ३६ विदेशी नागरिक छन् जसमा ८ भारतीय पनि समावेश छन् ।
हमलाकर्तालाई देखेको दाबीः
नेगोम्बोमा एक व्यक्तिले एएफपीलाई दिएको जानकारी अनुसार सेन्ट सेबस्टियन चर्चमा उनी श्रीमतीसँग प्रार्थना गर्न गएका थिए । तर त्यहाँ अत्यधिक भीड भएकाले उनी उभिन चाहेनन् र अर्को चर्चमा गएको जानकारी दिए ।
दिलिप फर्नान्डो चर्चबाट त निस्किए तर उनका परिवारका केही सदस्य भित्र थिए । उनले आत्मघाती हमलाकर्तालाई देखेको दाबी गरे ।
दिलिपले भने, ‘त्यहाँ मैले एक युवकलाई भारी ब्याग बोकेर चर्च भित्र आएको देखेको थिएँ । उनले मेरो हजुरबुवाको टाउको पनि छोएका थिए । ती युवक नै हमलाकर्ता थिए ।’