सर्वेक्षण भन्छः टोकियोमा अधिकांश विदेशीमाथि भेदभाव
प्रकाशित मिति : बैशाख ५, २०७६ बिहीबार
जापानको राजधानी टोकियोमा बस्ने अधिकांश विदेशी नागरिक भेदभावको शिकार हुने गरेको एक सर्वेक्षणले देखाएको छ । एण्टि रेसिजम इन्फर्मेशन सेण्टरले गरेको सर्वेक्षणअनुसार ३ सय ४० जनामध्ये १ सय ६७ जनाले आफू भेदभावको शिकार भएको अभिव्यक्ति दिएका थिए ।
उनीहरु रंगभेदी व्यवहारको शिकार हुनुका साथै जापानी भाषाभन्दा अर्को भाषा बोल्नमा पनि उनीहरुलाई रोक लगाइएको सर्वेक्षणमा सहभागिले बताएका छन् । केही खुद्रा पसलमा काम गर्ने विदेशी क्याशियरले ग्राहकहरुले जापानी क्याशियरको माग गर्ने गरेको पनि बताए ।
यो सर्वेक्षण फेब्रुअरी र मार्चको बीचमा सञ्चालन गरिएको थियो । कुनै कुनै ग्राहकले त विदेशीलाई क्याशियरको रुपमा काम गरिरहेको आफूलाई मननपर्ने समेत बताउने गरेका जापानी औषधी पसलमा काम गर्ने एक नेपाली व्यक्तिले बताए ।
त्यस्तै विदेशीहरुलाई आफ्नो भाषा बोल्न समेत नदिने गरेको एक चिनियाँ व्यक्तिले दुखेःसो पोेखे । साथै अपार्टमेण्टका लागि आवेदन पनि विदेशी भएकै कारणले अस्विकृत हुने गरेका उदाहरणहरु पनि प्रशस्तै छन् ।
विदेशीहरुले भोग्नुपरेका भेदभाव विरुद्ध कुनै ठोस कदम चाल्ने बारे सरकारको ध्यानाकर्षण नभएको नागरिक समाजका प्रतिनिधि योंग सोंगले बताए । सरकारले विदेशीले कस्ता प्रकारका भेदभावहरु भोग्नुपरेको छ भन्ने बारे बेलाबेलामा सर्वेक्षणको आयोजना गर्ने र समाधानका उपाय पनि चाल्नुपर्नेमा उनले जोड दिएका छन् ।
यो समस्याका सम्बोधनका लागि सरकारी अधिकारीको संलग्नता हुने संयन्त्रको स्थापना गर्न आवश्यक रहेको उनको भनाइ छ । सरकारले बढीभन्दाद बढी विदेशी कामदार भित्र्याउने तयारी गरिरहेकाद बेला यो कदमको निकै महत्व रहेको बताइएको छ ।