नेता टाइपकाे भाषण अाउँदैन : अभिनेत्री करिश्मा मानन्धर

प्रकाशित मिति : पुस २३, २०७३ शनिबार

चर्चित अभिनेत्री करिश्मा मानन्धर पछिल्लो समय राजनीतिमा सक्रिय छिन् । झन्डै नौ महिनाअघि डा. बाबुराम भट्टराईको नयाँ शक्ति नेपालमा आबद्ध भएकी उनी अचेल कलाकारिता कम, राजनीति कार्यक्रममा ज्यादा देखिने गरेकी छिन् । फिल्म अभिनय, निर्माणबाट जस्तैै राजनीतिबाट पनि समाजमा योगदान दिने उत्कट चाहनाले आफूलाई राजनीतिमा डोर्‍याएको दाबी उनको छ । नयाँ शक्तिमा आबद्ध भएपछिका विविध अनुभव र अनुभूतिबारे उनले  सन्तोष भट्टराईसँग कुराकानी गरेकी छिन् :

डा. भट्टराईसँग पहिलो भेट
विभिन्न राजनीतिक कार्यक्रममा बाबुरामजीलाई देखिरहन्थेँ । उहाँ प्रधानमन्त्री नबन्दासम्म हाम्रो देखादेख मात्र भयो । नेपालमा जनता र नेताबीच ठूलो खाडल छ । तर, जसरी अन्य नेतासँग भेट्न झन्झटिलो प्रक्रिया पार गर्नुपर्छ, डा. भट्टराईसँग भेट्नचाहिँ पहिल्यैदेखि सहज रहेछ । उहाँसँगको पहिलो भेटमा नै मैले महसुस गरेको के हो भने कसैले पनि उहाँसँग भेट हुन्छ कि हुँदैन भनेर सुर्ता मान्नुनपर्ने रहेछ ।

उहाँ प्रधानमन्त्री भएपछि म बधाई दिन पुगेँ । सहजै भेट्न पाएँ । अन्त्यमा उहाँले मुस्कुराउँदै तपार्इंको कुनै माग छ कि ? भनेर सोध्नुभएको थियो । मैले ‘मेरो व्यक्तिगत माग केही पनि छैन सर । तपाईं प्रधानमन्त्रीको पदबाट बाहिरिँदा जनताले पछिसम्म सम्झिइरहने केही काम गर्नुहोला’ भनेकी थिएँ ।

स्वविवेकले लागेँ राजनीतिमा
चुनावको समय विभिन्न राजनीतिक पार्टीले कलाकारलाई प्रयोग गर्ने हाम्रोमा प्रचलन नै भइसकेको छ । मलाई पनि चुनावको समयमा विभिन्न पार्टीका नेताहरूले ‘आउनुहुन्छ कि’ भनेर सोधिरहनुहुन्थ्यो । मलाई अघिल्ला चुनावमा राजनीतिमै आउने प्रबल चाहना भएन ।

तर, जब डाक्टर सा’बले पार्टी परित्याग गर्नुभयो, मैले पनि यसबारेमा सोच्न थालेकी थिएँ । तत्कालीन एमाओवादी पार्टी परित्याग गरेपछि उहाँले विभिन्न संस्था र नागरिक समाजका सामु राखेको विचार मलाई मन परिरहेको थियो ।

त्यसै क्रममा म राजनीतिमा आएर केही योगदान दिन सक्छु भने किन नआउने भन्ने लाग्यो । र, त्यही सिलसिलामा म नयाँ शक्तिमा जोडिएँ । म आफ्नै विवेकले नयाँ शक्तिमा आबद्ध भएकी हुँ । न उहाँले मलाई कहिल्यै राजनीतिमा आउन भन्नुभयो, न मैले नै उहाँलाई कर गरेँ । म आफैँ पार्टीमा लागेकी हुँ ।

श्रीमानलाई समेत सोधिनँ
आफू राजनीतिमा होमिने निर्णय गर्न मलाई कठिन त भयो नै । नेपालको राजनीति आलोचित छ, त्यसमाथि सामाजिक प्रतिष्ठा आर्जन गरेको कलाकार राजनीतिमा सामेल हुँदा कहीँ न कहीँ दर्शकको मन दुख्ला भन्नेमा म सचेत थिएँ । यति हुँदाहुँदै पनि आफू सही बाटोमा भए समयले नै दर्शकको चित्त दुखाइको उत्तर दिनेछ भनेर मन बुझाएकी छु ।

म पार्टीमा लाग्दा कोही दर्शक, शुभचिन्तककोे चित्त दुखेको रहेछ भने म असल काम गरेर मलमपट्टी लगाउनेछु । म मेरो श्रीमान् विनोदलाई नसोधी कुनै पनि निर्णय गर्दिनँ । तर, राजनीतिमा आउने निर्णय गर्दा मैले विनोदलाई सोधिनँ । म चाहन्थेँ, यो मेरो नितान्त व्यक्तिगत निर्णय रहोस् । अर्को कारणचाहिँ मेरो परिवारले मलाई द्विविधामा पारिदिन्छ भनेर मैले कसैलाई यो निर्णय ‘सेयर’ गरिनँ ।

एकैचोटि म नयाँ शक्तिमा प्रवेश गर्ने समाचार सञ्चारमाध्यममा आएपछि उहाँहरूले थाहा पाउनुभयो । समाचार सुनेपछि विनोदजीले मलाई ‘तिमीले आफ्नो निर्णय बुझेरै गरेको हो ?’ भनेर सोध्नुभयो । मैले ‘हो’ भनेँ । त्यसपछि उहाँले मलाई थप कुनै प्रश्न गर्नुभएन । र, आजसम्म मेरो निर्णयलाई कुनै अवरोध पनि गर्नुभएको छैन । मेरी छोरी कविताले चाहिँ ‘पोलिटिक्स इज नट फर यू मामु’ भनिन् । मैले हाँसेरै टारिदिएँ ।

थाहा छ, मेरो आलोचना हुन्छ
नयाँ शक्तिमा जोडिएपछि मेरो आलोचना पनि हुने गरेको छ । मलाई राम्ररी थाहा छ । तर, मैले तमाम आलोचनालाई सहज रूपमै लिने गरेकी छु । कलाकारका रूपमा जताततै हाई–हाई भए पनि नेतृका रूपमा कुनै गल्ती–कमजोरीविना नै तीव्र आलोचनाको सिकारसमेत भएकी छु । म आफ्नो विचारमा प्रस्ट छु । त्यसैले आलोचनाकै कारण उत्तेजित हुने वा हीनताबोधले ग्रस्त हुने मेरो बानी छैन । अरूलाई गाली गर्नु आफूभित्र विकार हुनु पनि हो । हो, मलाई थाहा छ, नेपाली समाजमा राजनीतिप्रति अत्यन्त ठूलो वितृष्णा छ । तर, यसलाई पखाल्नु जरुरी छ । हामी राजनीतिमा संलग्नहरूकै सामूहिक प्रयत्न र असल कार्यको सुरुवातले यसलाई पखाल्न सकिन्छ ।

यसकारण नयाँ शक्ति रोजेँ
नेपालमा एक सय ८१ वटा राजनीतिक दल निर्वाचन आयोगमा दर्ता रहेछन् । मलाई एक सय ८० वटा राजनीतिक दलमा जानु नै थिएन । मेरो विचार केवल नयाँ शक्तिसँग मिल्न गयो । त्यसैले मैले यसलाई नै रोजेकी हुँ । हाम्रो नेपाललाई आर्थिक समृद्धि र सुःख–शान्ति चाहिएको छ । नयाँ शक्तिले नै पहिलोपल्ट यी सवालहरूलाई आफ्नो राजनीतिक मुद्दा बनायो । राजनीतिक अधिकारप्राप्तिको चरण समाप्त भएको र देश आर्थिक समृद्धिको चरणमा जानु आवश्यक भएको मेरो निचोडसँग नयाँ शक्तिको एजेन्डा मिलेका कारण म यसमा आबद्ध भएकी हुँ ।

म सन् १९९५ मा चीनको बेइजिङ गएकी थिएँ । त्यसवेला बेइजिङमा खासै भौतिक पूर्वाधारको विकास भएको थिएन । तर, आजभन्दा तीन वर्षअघि बेइजिङ जाँदा म चकित परेँ । त्यहाँ निकै विकास भएको रहेछ । सन् १९९४ मा एक कार्यक्रमको सिलसिलामा कतार गएकी थिएँ । चारैतिर झाडी मात्र थियो । तर, आज संसारको ध्यान तान्न सफल देश भएको छ कतार । समुद्र पुरेर त्यसमाथि सहर ठड्याइएको छ । चारैतिर मरुभूमिलाई हरियाली बनाएको छ । हाम्रो देशका युवाहरूलाई आयात गरिरहेको छ कतारले । त्यसैले हाम्रोमा पनि अरू देशको झैँ विकास र समृद्धि सम्भव छ भनेर नै म नयाँ शक्तिमा प्रवेश गरेकी हुुँ।

राजनीतिक जीवनका नौ महिना
म नयाँ शक्तिमा आबद्ध भएको करिब नौ महिना भयो । कलाकारका रूपमा नभई नेतृका रूपमा राजनीतिक कार्यक्रममा भाग लिन विभिन्न ठाउँमा पुगेकी छु । कतिपय ठाउँमा डा. बाबुराम भट्टराईसँगै राजनीतिक कार्यक्रममा भाग लिएँ । यसले मलाई के सिकायो भने सिनेमाको पर्दामा देखाइने सुन्दर ‘सिन’भन्दा जनताको वास्तविक जीवनको चित्र भिन्न रहेछ । जनताको अवस्था अझै पनि दर्दनाक रहेछ भन्ने बोध भयो । कलाकारिता र राजनीतिको भाषा नै भिन्न हुने रहेछ । तर, जनताले त सामान्य भाषा नै बुझेको महसुस गरेकी छु ।

नेताहरूले बोल्ने भाषा कहिलेकाहीँ ‘हेभी’ भइदिन्छ । त्यसलाई बुझ्न सर्वसाधारणलाई निकै गाह्रो परेको देखेकी छु । अहिले हाम्रो पार्टीमा डा. सा’बले नै दस्तावेज लेखनमा बारम्बार सामान्य भाषा प्रयोग गरौँ भन्नुहुन्छ । त्यसैले जनताले बोल्ने साधारण भाषालाई प्राथमिकता दिएका कारणले नयाँ शक्तिमा मलाई सहज नै महसुस भएको छ । हाम्रो भाषा र काम गराइ जनमुखी हुनुप-यो, नेतामुखी होइन । हामी कलाकारले लगाउने पोसाक र राजनीतिक व्यक्तिले लगाउने पोसाकमा केही भिन्न भएको महसुस गरेकी छु । म त कलाकार हुँ । रातारात आफूलाई परिवर्तन गर्ने भन्ने पनि हुँदैन । राजनीति गर्ने भन्दैमा साडी र कुर्ता मात्र लगाउनुपर्छ भन्ने पनि हुँदैन । त्यसैले उहाँहरूले मलाई कलाकारकै पोसाकमा स्विकार्नुपर्छ भन्ने मलाई लाग्छ ।

नेता टाइपको भाषण आउँदैन
मलाई महसुस छ कि नेताले बोल्ने भाषाशैली र कलाकारले बोल्ने भाषाशैलीमा धेरै भिन्नता रहेछ । मलाई लाग्छ– नेताले आम सर्वसाधारणभन्दा फरक देखिने प्रयास गर्नुभएन । नेताहरू पनि हाँस्नुप¥यो, नाच्नु र गाउनुप¥यो । आम नागरिकभन्दा फरक देखिनुपर्ने मान्यताले नेतालाई जनमुखी नबनाएको होला भन्ने लाग्छ । मलाई अझै पनि ‘नेता टाइप’को भाषण गर्न आउँदैन । सामान्य नागरिकको भोगाइ र भाषाशैली नै मलाई मनपर्छ । त्यही भएर मैले बोलेको नेताले बोलेको भन्दा फरक हुन्छ ।

कलाकारिता मेरो ‘प्यासन’ हो । यसलाई म कहिल्यै पनि छाड्दिनँ । अहिले पनि विभिन्न समारोहमा म कलाकारकै रूपमा उपस्थित हुन्छु । फेरिएको मेरो भूमिकाका कारण राजनीति र कलाकारितामा तालमेल मिलाउनचाहिँ गाह्रो परेको छ । तर, म कोसिस गरिरहेकी छु । त्यसैले अहिले पनि मेरो पहिलो चुनौती नै समय व्यवस्थापन गर्नु हो । मैले हाल यसैमा ध्यान दिइरहेकी छु । कलाकारिताबाट मात्र होइन, अब राजनीतिबाट पनि समाजमा केही योगदान गर्न चाहन्छु । यसका लागि मलाई मेरा दर्शकरूपी आम जनताको साथ चाहिन्छ । नयाँ पत्रिकाबाट

KHASOKHAS EDITORIAL TEAM

Editor-in-Chief : Kishor Panthi
Deputy Editor-in-Chief : Ashmita Khadka
Executive Editor : Anil Adhikari
English Editor: Rajan Thapaliya
Editor: Deepak Pariyar
Editor (Business/US Politics) : Suresh Shahi
Multimedia Editor/Presenter : Kiran Marahatta
Europe Editor: Hari Krishna Panthi
Online Editors: Suraj Ghimire, Bikram Khatri, Aashish Khanal, Dikshya Panthi
Chief Photographer: Dipendra Dhungana
Editor (Empowerment) : Sapana Pariyar

KHASOKHAS TEAM

Int. Representative: KP Neupane(Jackson)
Resource Person: Bishwa Bahadur Shah
Goodwill Ambassador: Yam Baral

Contact Us

© 2021 KHASOKAHS. All Rights Reserved. Namaste International Media Group (worldwide) and Namaste Media Inc (USA)
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com