कुकुरले टोक्दा डेढ दर्जन पशु-चाैपाया मरे !
प्रकाशित मिति : फाल्गुन १३, २०७५ सोमबार
बहुला कुकुरले टोक्दा यहाँ दुहुना गाई र बाच्छाबाच्छी मरेका छन् । भद्रपुर नगरपालिका वडा नं ३ मा कुकुरकाे टाेकाइबाट डेढ दर्जनभन्दा बढी पशु-चौपाय मरेपछि स्थानीयहरुमा त्रास फैलिँदाे छ ।
बहुला कुकुरले किसानहरुका गोठमा बाँधिएका तथा चरनमा छाडिएका गाई, राँगा, बाछाबाछी, खसी-बाख्रालगायत दर्जनाैँ पशु-चाैपायालाई टोकेपछि रेबिज लागेर मर्न थालेकाे बताइएकाे छ ।
भद्रपुर नगरपालिकाका पशु सेवा शाखाका प्राविधिक गणेश भट्टाराईका अनुसार वडा नं ३ स्थित सूर्यनगरका विसु मर्डीले पालेको कुकुर बौलाएपछि जथाभावी टाेक्दै हिँडेकाे छ । यसबाट सबैभन्दा बढी सन्थाल बस्तीमा चौपाया मरेको उनले जानकारी दिए ।
बहुला कुकुरलाई मार्न स्थानीयले माग गरे पनि जनावर मार्न नपाइने अन्तर्राष्ट्रिय मान्यताका कारण कुकुरलाई मार्न नसकिने बरु बन्ध्याकरण गरी प्रजननदर घटाउने र रेबिजविरुद्धकाे सुई लगाउने गरिएकाे भद्रपुर नगरपालिकाले जनाएकाे छ ।
बहुला कुकुरकाे प्रकाेप फैलिएपछि साे क्षेत्रमा मानिस तथा पशुचाैपायालाई रेविजविरुद्धको खोप लगाइएकाे भट्टाराईले बताएका छन् । आइतबार मात्रै सूर्यनगर र मंगलबारेमा मानिस र चौपायालाई गरी भेटेरिनरी अस्पताल तथा पशु सेवा केन्द्रबाट उपलब्ध १४ वटा रेबिज विरुद्धको खोप लगाइएको छ ।