केन्टकीमा नेपालीको हत्यामा संलग्नलाई तोकियो २० लाख डलर धरौटी, आजिवन जेल सजाय हुनसक्ने
प्रकाशित मिति : फाल्गुन १३, २०७५ सोमबार
केन्टकीमा बिहिबार राती एकजना नेपालीको हत्यामा संलग्न अभियुक्त शद्राच पिलेरलाई २० लाख डलर धरौटीसहित हिराशतमा राखिएको छ । हत्याको अभियोग पुष्टी भएको खण्डमा पिलेरलाई आजिवन कारावाशको सजाय हुनसक्ने जनाइएको छ ।
पिलेरले बिहिबार राती केन्टकीको एलिजाबेथ टाउनमा रहेको टिमार्ट स्टोरमा सुवाश घलेको गोली हानी हत्या गरेको अभियोग स्वीकार गरिसकेको जनाइएको छ । बिहिबार राती करिब साढे ११ बजेतिर पिलेरले स्टोरमा गई सुवाश घले र त्यहाँ कार्यरत अर्का नेपाली प्रयास बानियामाथि गोली चलाएको थियो ।
घलेको घटनास्थलमा नै मृत्यु भएको थियो भने बानियाको अवस्था गम्भिर रहेको छ । बानियाको लुईभिलको युनिभर्सिटी हस्पिटलमा उपचार भइरहेको छ । एयर एम्बुलेन्स मार्फत बानियालाई उक्त अस्पतालमा लगिएको थियो ।
३५ बर्षीय पिलेरले सुरुमा आफूसँगै बस्ने चेरी निकोल टर्नेर नामकी युवतीमाथि गोली हानेको थियो । त्यसपछि टिमार्ट पुगेर पार्किङ लटमा रहेकी नादिया ब्राउनीको खुट्टामा गोली हानेको थियो । टर्नेरको पनि मृत्यु भइसकेको छ भने ब्राउनीको उपचार भइरहेको छ । ब्राउनीमाथि गोली हानेपछि पिलेरले स्टोरमा गएर घले र बानियामाथि गोली हानेको थियो ।
पिलेरमाथि फस्ट डिग्री आक्रमण र सेकेण्ड डिग्री आक्रमणको अभियोग लगाइएको छ । हार्डिन काउन्टी डिटेन्सन सेन्टरमा राखिएका पिलेरलाई २० लाख डलर नगद धरौटी समेत तोकिएको छ । सोमबार पिलेरलाई अदालतसमक्ष पेश गरिनेछ र औपचारिक रुपमा अभियोग लगाएर मुद्दा अगाडि बढाइनेछ ।
