अछाममा पनि एनसेल टावरमा आगजनी
प्रकाशित मिति : फाल्गुन ११, २०७५ शनिबार
अछामको ढकारी गाउँपालिका–३ मा रहेको एनसेल टावरमा शुक्रबार राति आगजनी गरिएकाे छ । आगजनीबाट एनसेलकाे माेबाइल सेवा अवरुद्ध भएकाे छ ।शुक्रबार मध्यराति गरिएकाे आगजनीबाट साढे दुई मिटर जति तार जलेकाे जिल्ला प्रहरी कार्यालय अछामले जनाएको छ।
आगजनी नेपाल कम्युनिष्ट पार्टी विप्लव समूहले गरेको हुनसक्ने आशंका प्रहरीले गरेको छ। ‘अहिले नै कसले आगजनी गर्यो भन्ने स्पष्ट भइसकेको छैन। तर विप्लव निकट नेकपा माओवादीले जलाएको प्रारम्भिक अनुसन्धानमा देखिएकाे छ। बाकी अनुसन्धान कै क्रममा छौं,’ अछाम प्रहरी प्रमुख डिएसपी जनकबहादुर शाहीले भने।जिल्लामा रहेका अन्य एनसेल टावरमा पनि आगजनी हुनसक्ने भन्दै ती स्थानमा प्रहरीले सुरक्षा व्यवस्था कडा पारेको छ।