नेकपाको कार्यदल भंग, बाँकी काम सचिवालयले नै गर्ने
प्रकाशित मिति : फाल्गुन १०, २०७५ शुक्रबार
नेपाल कम्युनिस्ट पार्टी (नेकपा)को संगठनात्मक एकीकरण टुंग्याउन गठित कार्यदल शुक्रबारबाट भंग भएको छ ।
आज बिहान बालुटारमा बसेको नेकपाको सचिवालय बैठकले सो निर्णय गरेको हो ।
शुक्रबारको बैठकपछि सञ्चारकर्मीसँग कुरा गर्दै नेकपाका प्रवक्ता नारायणकाजी श्रेष्ठले कार्यदल भंग गरिएको र अब कार्यदलको बाँकी काम सचिवालयले नै गर्ने बताउनुभयो। बिहीबार कार्यदल र सचिवालयको संयुक्त बैठक बसेको थियो ।
बैठकमा कार्यदलले एकीकरणको खाका (जिल्लातहको नेतृत्वको सिफारिससमेत) बुझाउन सात दिनको समय माग गरेको थियो ।
कार्यदलको म्याद नथपिएको अवस्थामा माधव नेपाल पक्षधरका सदस्यहरुले छुट्टै समानान्तर प्रतिवेदन बुझाउने तयारी गरेका छन् । बिहीबारको बैठकमा बोल्ने नेपाल समूहका सबै सदस्यले कार्यदललाई निस्कृय बनाइएको आरोप लगाएका थिए ।