अमेरिकामा हिमपात, १७ सय उडान रद्द, कैयन विद्यालय बन्द
अमेरिकाका विभिन्न स्थानमा बुधबार हिमपात र बरफबर्षाका कारण कैयन उडानहरु रद्द गरिएका छन् भने विद्यालयहरु बन्द गरिएका छन् । बुधबार विहानसम्म खराब मौषमका कारण १७ सय उडानहरु रद्द गरिएका छन् ।
मिनेसोटामा विद्यालयहरु बन्द गरिएका छन् भने हिमपातले मेरिल्याण्ड र वासिंटन डिसी क्षेत्रसमेत प्रभावित भएको छ । रद्द गरिएका अधिकांश उडानहरु वसिंटन र बाल्टिमोरका विमास्थलमा उडान वा अवतरण हुनेहरु रहेका छन् ।
खराब मौषमको चपेटामा सिंगै अमेरिका पर्ने मौषमविदहरुले चेतावनी दिएका छन् । न्युयोर्कमा अपरान्हदेखि हिमपात सुरु भएको छ भने बेलुका बरफ मिसिएको पानी पर्ने जनाइएको छ ।
मेरिल्याण्ड र पेन्सिलभेनिया सिमाक्षेत्रमा ८ इन्चसम्म हिमपात
अमेरिकामा बुधबारको हिमपात र बरफबर्षाबाट झण्डै १६० मिलियन व्यक्ति प्रभावित हुने मौषमविदहरुले अनुमान गरेका छन् । हिउँ र बरफ मिसिएको बर्षा पूर्वी अमेरिकाका भागहरुमा विहिबारसम्म नै हुने जनाइएको छ ।
अमेरिकाको दक्षिण पूर्वीभागमा बाढीको समेत चेतावनी दिइएको छ । जसबाट झण्डै २० मिलियन व्यक्ति प्रभावित हुनेछन् । दक्षिणीभागमा बुधबार दिनभर बर्षा हुने अनुमान गरिएको छ ।
ओक्लोहोमा, कन्सास, शिकागो, इन्डिन्यापोलिस, लुइभिल, सिनसिनाटी, कोलम्बस, ओहायो, पिट्सबर्ग लगायतका क्षेत्रहरुमा हिमपात र बरफबर्षा हुने अनुमान गरिएको छ । नेब्रास्का, आयोवा, मिनेपोलिस लगायतका क्षेत्रमा १० इन्चसम्म हिमपात हुने अपेक्षा गरिएको छ ।मेरिल्याण्ड र पेन्सिलभेनिया सिमाक्षेत्रमा बुधबार दिउसो ८ इन्चसम्म हिमपात हुने अपेक्षा गरिएको छ ।
