यी मनकारी ट्याक्सी चालक जसले फिर्ता गरे ट्याक्सीमा छुटेको ३ लाख बढीको गहना
प्रकाशित मिति : फाल्गुन ८, २०७५ बुधबार
बा २ ज २२७९ नम्बरका ट्याक्सी चालकले ट्याक्सीभित्र छुटेको यात्रुको लाखौं मूल्यको गहना प्रहरीमार्फत् फिर्ता गरेका छन् । चालक सिमल राईले गुल्मी वाझकटेरी–३ वस्ने वर्ष २८ की वसन्ता भुषालकी बहिनी सोनिया भुषाललाई सामान फिर्ता गरेका हुन् ।
उनले महानगरीय ट्राफिक महाशाखामा आएर आफैं सामान बुझाएको महाशाखाका एसएसपी वसन्त पन्तले जानकारी दिए । वसन्ता बुधबार बिहान अनामनगर भाटभटेनीदेखि नैकापसम्म ट्याक्सीमा गएकी थिइन् । उत्रिँदा उनको सामान ट्याक्सीमै छुटेको चालकले देखेपछि आफैले ट्राफिक महाशाखामा समान पुर्याएका थिए । ट्याक्सीमा १ थान मंगलसूत्र (ठूलो), १ थान सानो मंगलसूत्र, चन्द्रमुखी, तिलहरी, घाँटीको हार लगायत गरी झण्डै साढे ३ लाख बढीको गहना छुटेको थियो ।