यी हुन् अमेरिकामा एसाइलम खोज्दा मेक्सिको फिर्ता पठाइएका पहिलो व्यक्ति, नयाँ नीति कार्यान्वयन सुरु
प्रकाशित मिति : माघ १६, २०७५ बुधबार
अमेरिकी सरकारको नयाँ नीति अन्तरगत अमेरिकाको पोर्ट अफ इन्ट्रीमा आएर एसाइलमको लागि दावी गर्ने व्यक्तिलाई मंगलबारदेखि अदालती सुनुवाईसम्मका लागि मेक्सिको फिर्ता पठाउन थालिएको छ । क्यालिफोर्नियाको सान यिसिद्रो पोर्ट अफ इन्ट्रीबाट उनलाई अदालती सुनुवाई सम्मका लागि मेक्सिको पठाइएको हो ।
होण्डुरसका नागरिक ५५बर्षका कार्लोस गोमेज पेर्डोमोलाई सान यिसिद्रो पोर्ट अफ इन्ट्रीबाट मेक्सिको फिर्ता पठाइएको हो । उनी नै अमेरिकामा एसायलम खोज्दा अदालती सुनुवाई सम्मका लागि मेक्सिको पठाइएका पहिलो व्यक्ति बनेका छन् ।
नयाँ नियमको कार्यान्वयन शुक्रबारदेखि हुने जनाइएपनि मंगलबारमात्र एकजनालाई मेक्सिको फिर्ता पठाइएको हो । मेक्सिकन अधिकारीहरुले सान यिसिद्रो पोर्ट अफ इन्ट्रीबाटमात्र हरेक दिन २० जनासम्मलाई मेक्सिको फिर्ता पठाउने सहमति भएको जनाएका थिए ।
मेक्सिकन अध्यागमन अधिकारी रोडुल्फो फिगोराले होण्डुरसका ति व्यक्तिलाई हतार हतार भ्यान भित्र हालेका थिए । उनका अनुशार मंगलबार अरु कसैलाई पनि मेक्सिको फिर्ता पठाइएको छैन ।
अक्टोबरमा होण्डुरसबाट हिडेका उनी नोभेम्बरमा सिमाक्षेत्रमा आएका थिए । उनलाई महिनौं प्रतिक्षामा बसेपछि सोमबारमात्र एसाइलमका लागि समय दिइएको थियो ।
जनवरी २५ मा डिपार्टमेन्ट अफ होमल्याण्ड सेक्युरिटीकी सेक्रेटरीले मेक्सिकोको सरकारसँग समन्वय गरेर नीति कार्यान्वयन गर्न निर्देशन दिएकी थिइन् । अमेरिका सिमाक्षेत्रबाट प्रवेश गरेर एसाइलम खोज्नेहरुलाई अदालती सुनुवाई सम्मका लागि मेक्सिको फिर्ता पठाउने नीति गत डिसेम्बरमा घोषणा गरिएको थियो ।
मेक्सिकोले उनीहरुलाई मानवीय भिसा उपलब्ध गराउन सक्नेछ । अदालती सुनुवाईको दिनमा भने आइसका अधिकारीहरुले यात्राको प्रबन्ध गर्नेछन् । यदि एसाइलम स्वीकृत भएमा अमेरिका बस्न अनुमति दिइनेछ भने अस्वीकृत भएमा सम्बन्धित देशमा डिपोर्ट गरिनेछ ।