अमेरिकामा एसाएलम गर्नेलाई मेक्सिको फिर्ता, सानबाट यिसिर्दोबाट हरेकदिन २० जनासम्म


प्रकाशित मिति : माघ १२, २०७५ शनिबार

अमेरिकाको क्यालिफोर्नियाको सान डिएगो क्षेत्रमा रहेको सान यिसिर्दो पोर्ट अफ इन्ट्रीमा एसाइलम गर्ने २० जनासम्मलाई टिवानाहुँदै मेक्सिको पठाइने भएको छ । उनीहरुले अमेरिकी अदालतमा एसाइलमको सुनुवाईको मिति नआउँदासम्म मेक्सिकोमा नै बसेर प्रतिक्षा गर्नुपर्नेछ ।

गत डिसेम्बर २० मा अमेरिकी सरकारले एसाइलमबारे ल्याएको नयाँ नीति अन्तरगत सिमाक्षेत्रबाट आएर अमेरिकामा एसाइलम गर्नेहरुलाई अदालती सुनुवाईसम्मका लागि मेक्सिको पठाउन थालिएको हो । उनीहरुलाई मेक्सिकोले त्यहाँ रहुन्जेल मानवीय भिसा र वर्क परमिट प्रदान गर्न सक्नेछ ।

सान डिएगोको सान यिसिद्रो पोर्ट अफ इन्ट्रीबाट टिवानाहुँदै हरेक दिन २० जनासम्मलाई मेक्सिको पठाइने अपेक्षा गरिएको मेक्सिकोका विदेशमन्त्रालयका प्रवक्ता रोबर्टो भेलास्कोले रोयटर्सलाई जनाएका छन् । यसरी फर्काइएकाहरुले मेक्सिको सरकारले खाना र आवासको सुविधा प्रदान नगर्ने तर मानवीय आधारमा भिसा दिनसक्ने उनले जनाएका छन् ।

अमेरिकी अधिकारीहरु र आफूहरुबीच हरेकदिन बढीमा २० जनासम्म एसाइलम आवेदकलाई सान यिसिद्रो पोर्ट अफ इन्ट्रीबाट फिर्ता पठाउन सहमति भएको प्रवक्ताले बताएका छन् । विस्तारै अरु पोर्ट अफ इन्ट्रीबाट पनि एसाइलम आवेदकलाई मेक्सिको फिर्ता पठाउन सुरु गरिनेछ ।

अदालतमा सुनुवाईको मिति दिइएकाहरुलाईमात्र मेक्सिकोले स्वीकार गर्ने तर मेक्सिकोका लागि खतरा हुने, स्वास्थ्य समस्याबाट पीडित र अभिभावक विनाका केटाकेटीहरुलाई भने स्वीकार नगर्ने प्रवक्ताको भनाई छ । यस अगाडि अमेरिकामा एसाइलम गर्नेहरुलाई सुनुवाईको मितिसम्म अमेरिकामा नै रहेर काम गर्न अनुमति दिइदै आएको थियो ।

तर अब आवेदकहरुलाई नोटिस टु अपियरको सुचना दिएर मेक्सिको नै फिर्ता पठाउन लागिएको अमेरिकी अधिकारीहरुले जनाएका छन् । उनीहरुलाई सुनुवाईका लागि इमिग्रेशन एण्ड कस्टम इन्फोर्समेन्ट आइसले यातायातको प्रबन्ध गर्नेछ तर सुनुवाईको अन्तरिम मितिसम्म उनीहरु मेक्सिकोमा नै बस्नुपर्नेछ । यदि मुद्दा जितेमा उनीहरुलाई अमेरिका आउन अनुमति दिइनेछ भने हारेमा उनीहरुकै देशमा फिर्ता पठाइनेछ ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com