मैले युएससीआईएसमा एसाइलम आवेदन दिदैछु , के मलाई मेक्सिको पठाइन्छ ?
प्रकाशित मिति : माघ १३, २०७५ आईतबार
मैले युएससीआईएसमा एसाइलम आवेदन दिने योजना बनाएको छु । के मलाई एसाइलम आवेदनबारे निर्णय नहुँदासम्म मेक्सिको पठाइन्छ ?
यदि तपाई युएससीआईएसमा एसाइलमका लागि आवेदन दिदै हुनुहुन्छ भने तपाईलाई मेक्सिको पठाइदैन । तपाईले अमेरिकामा नै बसेर आफ्नो आवेदनको निर्णय पर्खन सक्नुहुनेछ । तर तपाईको अन्तरवार्ता एकमहिनाभित्र नै हुनेछ । यदि तपाईको आवेदन अस्वीकृत भएमा र तपाईको भिसा अद्यावधिक नरहेको खण्डमा तपाईको मुद्दा अध्यागमन अदालतमा रिफर गरिनेछ । तपाईले अमेरिकामा नै बसेर अदालती सुनुवाई कुर्न पाउनुहुनेछ ।
तर तपाईले अमेरिकी सिमाक्षेत्रमा विना भिसा आएर एसाइलम दावी गर्नुभयो भने नयाँ नियम अनुशार तपाईले अदालती सुनुवाईको मिति मेक्सिकोमा नै बसेर कुनुपर्ने हुनसक्छ । अहिलेका लागि क्यालिफोर्नियाको सान डिएगो स्थीत सान यिसिर्दो पोर्ट अफ इन्ट्रीमा आएर एसाइलम दावी गर्नेहरुलाई मात्र अदालती सुनुवाई सम्मका लागि मेक्सिको फिर्ता पठाउन थालिएको छ । अहिलेका लागि खासगरी उत्तर अमेरिकी देशका नागरिकलाईमात्र मेक्सिको फिर्ता पठाउन थालिएको छ ।
मेक्सिकोले अदालती सुनुवाईको मिति तय भएकाहरुलाई मानवीय भिसा र वर्क परमिट प्रदान गर्नसक्छ । तर तपाई मेक्सिकोको राष्ट्रिय सुरक्षामा खतरा रहेको, स्वास्थ्य खराब रहेको वा अभिभावकविनाको बालबालिका रहेको पाइएमा भने मेक्सिकोले स्वीकार नगर्ने जनाएको छ । अदालती सुनुवाईको मिति आइसकेपछि भने अध्यागमनले यातायातको प्रबन्ध गरेर अदालतसम्म ल्याउनेछ । यदि एसाइलम स्वीकृत भएमा अमेरिकामा बस्ने अनुमति दिइनेछ । अस्वीकृत भएमा सम्बन्धित देशमा फिर्ता गरिनेछ ।
अहिले क्यालिफोर्नियाको सान डिएगोबाट सुरु गरिएपनि विस्तारै अन्य पोर्ट अफ इन्ट्रीमा आएर एसाइलम गर्नेहरुलाई पनि मेक्सिको फिर्ता पठाइने जनाइएको छ । अहिले उत्तर अमेरिकी देशका नागरिकलाई मेक्सिको फिर्ता पठाउन प्राथमिकता दिइएपनि विस्तारै सबै देशकालागि पठाइने जनाइएको छ ।
याद राख्नुहोस्, विभिन्न भिसामा अमेरिकामा आएर युएससीआईएसमा एसाइलम गर्नेहरुका सन्दर्भमा भने यो नियम लागु हुनेछैन ।