अष्ट्रेलियामा नेपालीहरुको एकताबारे बोलीरहेको त्यो एउटा तस्बिर

नेपाल डेस्क

---

प्रकाशित मिति : माघ १४, २०७५ सोमबार

तस्बिर आफै बोल्छ भन्ने भनाइ सत्य हो भन्छन्, फोटोग्राफर अरुण चित्रकार । चित्रकार भन्छन्, ‘ फोटोग्राफी भनेको केवल मानिसको रुप तस्बिरमा उतार्नु होइन । फोटोग्राफी एउटा कला हो । फोटोमा अनगिन्ति भावहरु, शब्दहरु लुकिरहेका हुन्छन् । एउटा फोटोग्राफरले मानिसको अनुहार, हाउभाउ, उसको विशेष पल आदिको भावको गहिराइमा पुगेर त्यसलाई आफ्नो कलाको माध्यमबाट फोटोमा जीवित बनाउने कोसिस गरिरहेको हुन्छ ‘ ।

फोटोग्राफर अरुण चित्रकारले लिएको यस्तै एउटा तस्बिर अहिले अष्ट्रेलियामा चर्चामा आइरहेको छ । केही समय अगाडी मेलबर्नमा सम्पन्न भएको नेपाल महोत्सवमा चित्रकारले उक्त तस्विर लिएका थिए । अष्ट्रेलियामा रहेका नेपालीहरु आफ्नो कला, संस्कृति तथा आफ्नो पहिचानको सम्बर्द्धन तथा प्रबर्द्धन गर्न अग्रसर छन् । साथै यहाँ नेपाली समुदायको एकता सबैको लागि अनुकरणीय छ । चित्रकारले लिएको उक्त तस्बिरमा यी दुवै पक्ष राम्रोसंग अनुभव गर्न सकिन्छ । महोत्सवमा लिइएका अनेक तस्बिरहरुको बीचमा चित्रकारको उक्त तस्बिरले सबैलाई आकर्षित गरेको छ ।

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

Nepal Festival , Melbourne
Photo by : Arun Chitrakar

अरुण चित्रकार स्कुल जीवनमा नै फोटोग्राफी प्रति आकर्षित थिए । त्यतिबेला क्यामरामा रिल राख्नुपर्थ्यो । पकेट खर्चको रुपमा पाएको पैसा उनले जम्मा गर्थे र रिल किन्थे, अनि जान्थे भक्तपुर, पाटन, वसन्तपुर दरबार लगायतका ठाउँतिर । त्यहाँ जानुको उनको उद्देश्य फोटो खिच्नु मात्र थिएन । ती क्षेत्रमा पर्यटकहरु आएर फोटो लिइरहेका हुन्थे । उनलाई ती पर्यटकहरुले चलाइरहेका क्यामराको बारेमा, उनीहरुको फोटो खिच्ने तरिकाको बारेमा जान्न मन लाग्थ्यो । अहिले उनी सम्झिन्छन् , ” ती क्यामरा छुन पाए पनि आफूलाई भाग्यमानी लाग्थ्यो ” । त्यसपछि उनी आफ्नो क्यामराले फोटो खिच्दै हिंड्थे । कतीलाइ धुलाएर दिन्थे, कती आफूसंग घरमै रहन्थे । आफूले खिचेका ती फोटो अहिले पनि आफ्नो घरमा रहेको कुरा उनी बताउँछन् ।

अरुण चित्रकारलाई फोटो खिच्दा आफ्नो क्यामरामा व्यक्तिको या विशेष समयको कुनै पल कैद गर्न मन लाग्थ्यो । उनले ती फोटोमा जीवन देख्थे । आफूले खिचेका ती फोटोहरु स्थानिय पत्रिकामा छापिंदा उनलाई निकै खुशी लाग्थ्यो । पत्रिकामा आफ्नो फोटो छापिनु भनेको उनको लागि प्रोत्साहन, प्रेरणा, पारिश्रमिक, गौरव सबै थियो ।

अष्ट्रेलिया आइसकेपछि फोटोग्राफीको नशा चढेका चित्रकारलाई त्यसमा अझ डुब्न सिकायो । फोटोग्राफर साथी डेभिडसंगको संगतले उनले फोटोग्राफीको सही अर्थ, फोटोग्राफीको कला, फोटोमा दर्शाउन सकिने भावहरु बुझ्ने मौका पाए । त्यसपछि उनका फोटोहरुमा साँच्चै जीवन झल्किन थाल्यो । त्यस बीचमा उनले फोटोग्राफी सम्बन्धि थुप्रै सेमिनार तथा वर्कसपमा सहभागी हुने अवसर समेत पाए । उनमा फोटोग्राफीको माध्यमबाट एउटा फोटोग्राफरले धेरै परिवर्तन ल्याउन सक्ने रहेछ भन्ने ज्ञान भयो । त्यसपछि चित्रकारले अष्ट्रेलियामा नेपालका फोटोहरु राखिएको फोटो प्रदर्शनी गरे । उक्त प्रदर्शनीमा राखिएका फोटोहरुले नेपालको कला, संस्कृति, समाज, रहनसहन, पर्यटन आदि सबै पक्ष समेटेको थियो । उक्त फोटो प्रदर्शनी पछि धेरै अष्ट्रेलियनहरु नेपाल गएका थिए ।

Australia Day fireworks – Melbourne Photo by : Arun Chitrakar

अहिले सबैजसोसंग डिएसएलआर क्यामरा छ, तर फोटोग्राफी सम्बन्धि ज्ञान भने निकै कम छ । अरुण चित्रकार अष्ट्रेलियामा रहेको नेपाली समुदायलाई फोटोग्राफी सम्बन्धि आधारभूत ज्ञान दिन चाहन्छन् । जसले गर्दा समुदायका स-साना कार्यक्रम, जमघट हुँदा पनि ती पलहरु कलात्मक तरिकाले कैद होउन् र सधै ती पल जीवित रहीरहुन् ।

फोटोग्राफिमा रुची भएकाहरुका लागि अहिलेको समयमा राम्रो अवसर रहेको अरुण चित्रकार बताउँछन् । उनका अनुसार, युवाहरुले फोटोग्राफीलाई करियरकै रुपमा अगाडी बढाएर राम्रो आम्दानी गर्न सक्छन् । अहिले निकै प्रचलनमा रहेको वेडिंग फोटोग्राफी यसको उदाहरण पनि हो । अरुण चित्रकारका अनुसार, अहिले विकसित देशहरुमा फोटोहरुको माध्यमबाट जीवनकथा भन्ने सुरुवात भएको छ । यसले फोटोग्राफीलाई थप एक नयाँ उचाइ दिनेछ भन्नेमा उनी विश्वस्त छन् ।