भैँसी सुन्दरी प्रतियोगितामा प्रथमलाई ‘भैँसी पुरस्कार’ !
प्रकाशित मिति : माघ १३, २०७५ आईतबार
विपी स्मृति कृषि मेलाको अवसर पारेर कोशी गाउँपालिकाले आयोजना गरेको भैँसी सुन्दरी प्रतियोगिता सम्पन्न भएको छ ।
शुक्रबार सम्पन्न ‘भैँसी सुन्दरी प्रतियोगिता’मा कोशी गाउँपालिका–३ पश्चिम कुशाहाका बिन्देशर इशरको भैँसी प्रथम, बालेश्वर परसैलाको भैँसी दोस्रो र कोशी गाउँपालिका–४ का रामरत्न यादवको भैँसी तेस्रो भएको स्थानीय समाजसेवी धर्मेन्द्र विश्वासले जानकारी दिए ।
गाउँपालिकाका अध्यक्ष एयुव अन्सारीका अनुसार विजेता भएका भैँसी धनीलाई गाउँपालिकाले क्रमशः रु २५ हजार, १५ हजार र रु १० हजार नगद पुरस्कार दिनेछ । इनरुवा नगरपालिकाका प्रमुख राजन मेहताले प्रतियोगितामा प्रथम भएका भैँसी धनीलाई भैँसी नै पुरस्कार दिने घोषणा गरेका छन् ।
प्रतियोगितामा कोशी गाउँपालिका क्षेत्रभित्रका करीब दुई सयभन्दा बढी भैँसीलाई सहभागिता गराइएको थियो ।