अमेरिकामा नै जन्मेहुर्केर सेनामा काम गरेका व्यक्ति अध्यागमनको हिराशतमा
प्रकाशित मिति : माघ ४, २०७५ शुक्रबार
मिशिगनमा जन्मे हुर्केका अमेरिकाकै जन्मजात नागरिक जिल्मर रामोस गोमेजलाई अमेरिकी इमिग्रेशन एण्ड कस्टम इन्फोर्समेन्ट आइसले कागजपत्रविहिन भन्दै तीनदिन हिराशतमा राखेको छ । अमेरिकी सेनामा रहेर अफगानिस्तानमा झण्डै तीनबर्ष काम गरेका उनलाई गत डिसेम्बरमा आइसको हिराशतमा राखिएको खुलासा भएको छ ।
२७ बर्षीय गोमेजले आइससँगको अन्तरवार्ताका क्रममा आफू विदेशी रहेको र अमेरिकामा कागजपत्रविहिन रहेको बताएको आइसका अधिकारीहरुले दाबी गरेका छन् । तर गोमेजले सन् २०११ को अक्टोबरदेखि सन् २०१४ को अगस्तसम्म अमेरिकी सेनामा रहेर काम गरेका थिए । सेवाका क्रममा उनले कैयन मेडलहरु समेत प्राप्त गरेका थिए ।
विगतको दर्दनाक घटना विर्सन नसकेर चिन्ताग्रस्त हुने रोक पीटीएसडीबाट पीडित भएपछि उनी सैन्य सेवाबाट घर फर्किएका थिए । गत नोभेम्बरमा उनले मिशिगनको एउटा अस्पतालमा सानोतिनो आगो लगाएपछि उनलाई प्रहरीले पक्राउ गरेको थियो ।
उनले अदालतसमक्ष आफ्नो गल्ती स्वीकारेपछि उनलाई अदालतले थुनामुक्त गर्न आदेश दिएको थियो । तर स्थानीय अधिकारीहरुले उनलाई थुनामुक्त गर्नुको साटो आइसको जिम्मा लगाएका थिए । त्यसपछि आइसले उनलाई तीनदिन हिराशतमा राखेको थियो ।
यसअगाडि फिलाडेल्फियामा जन्मिएका अमेरिकी नागरिक पिटर सियन ब्राउनलाई पनि आइसले फ्लोरिडामा हिराशतमा राखेको थियो । लस एन्जलस टाइम्सले गरेको अनुसन्धान अनुशार आइसले सन् २०१२ यता १४ सय व्यक्तिलाई अमेरिकी नागरिक दावी अनुसन्धानपछि हिराशतमुक्त गरेको थियो ।