जनगणनामा नागरिकताबारेको प्रश्न थप्न ट्रम्प प्रशासनलाई लगायो अदालतले रोक
प्रकाशित मिति : माघ १, २०७५ मंगलबार
सन् २०२० को अमेरिकी जनगणनामा नागरिकताबारेको प्रश्न थप गर्नमा ट्रम्प प्रशासनलाई अदालतले रोक लगाएको छ । दक्षिणी न्युयोर्कका युएस डिस्ट्रिक्ट जज जेसे फरम्यानले जनगणनामा नागरिकताबारेको प्रश्न सोध्न अमेरिकी सरकारलाई रोक लगाएका हुन् ।
उनले जनगणनामा नागरिकताबारेको प्रश्न थप्नु गैरकानुनी रहेको बताएको छन् । जनगणनामा नागरिकताबारेको कुनै प्रश्न थप गर्नका लागि संसदलाई तीनबर्षको सुचना दिनुपर्ने नियमको पनि पालना नगरिएको न्यायाधिसको ठहर छ । आप्रवासी अधिकारवादी संस्थाहरुले अदालतको फैसलाको स्वागत गरेका छन् ।
गत मे महिनामा अमेरिकी सरकारको डिपार्टमेन्ट अफ कमर्सले जनगणनाबारेको प्रश्नमा नागरिकतासम्बन्धि प्रश्न थप्ने बताएको थियो । डिपार्टमेन्ट अफ जस्टिसले सन् २०१७ को डिसेम्बरमा गरेको अनुरोध अनुशार त्यसो गर्न लागिएको जनाइएको थियो ।
यी विषयमा क्यालिफोर्नियाको अदालतमा पनि मुद्दा दायर गरिएको छ । सर्बोच्च अदालतले पनि यो विषयलाई आगामी महिना सम्बोधन गर्ने जनाइएको छ ।