राजदूतको विवादास्पद भूमिकाबारे सरकारी मौनताप्रति कांग्रेसको आपत्ति
प्रकाशित मिति : मंसिर १९, २०७५ बुधबार
प्रमुख प्रतिपक्षी दल नेपाली कांग्रेसले अष्ट्रेलियाका लागि नेपाली राजदूत लक्की शेर्पाको विवादास्पद भूमिकाबारे सरकारको मौनताप्रति आपत्ति जनाएको छ । अष्ट्रेलियाका लागि नेपाली राजदूत शेर्पा ‘मानव तस्करीमा संलग्न’ भनेर प्रश्न उठाइएपनि सरकारले मौनता देखाएको प्रति प्रतिपक्षी कांग्रेसले आपत्ति जनाएको हो ।
‘‘अष्ट्रेलियाका लागि नेपाली राजदूत लक्की शेर्पाका सम्बन्धमा केहि समययता ‘मानव तस्करीमा संलग्न’ भनी उठेको प्रश्नलाई हामीले गम्भीर रुपमा लिएका छौँ,’’ कांग्रेस प्रवक्ता विश्वप्रकाश शर्माद्वारा बुधबार जारि विज्ञप्तिमा भनिएको छ, ‘‘निजकै सहयोगीले यो विषय सार्वजनिक गरेको साता दिन भइसक्दा समेत नेपाल सरकारले गम्भीर चासो प्रकट गरी अनुसन्धान नथाल्नु र मौनता राख्नुलाई हामीले झनै गम्भीर र दुःखद रुपमा लिएका छौं ।’’
राजदूत व्यक्तिगत जागिर नभई सिंगो राष्ट्र र राष्ट्रकै छविको प्रतिनिधित्व गर्ने गरिमामय जिम्मेवारी भएको जिकिर गर्दै उनले राजदूतका बारेमा उठेको प्रश्न उपर तत्कालै सत्य तथ्य निरुपण गर्ने कर्तव्य सरकारको रहेको स्मरण गराएका छन् । कांग्रेसले राजदूत शेर्पालाई तत्काल छानविनका लागि परराष्ट्र मन्त्रालयमा उपस्थित गराउन र दोषी ठहरिए बर्खास्त गर्ने कदम चाल्न समेत पनि भनेको छ ।
अष्ट्रेलियाको राजधानी क्यानबारामा रहेको नेपाली राजदूतावासमा चालकको काम गर्न गएका ओङ्छु शेर्पाले केही दिनअघि एक टेलिभिजनमा राजदूत लक्की शेर्पाले मानव तस्करी गर्दै आएको आरोप लगाएका थिए ।