जर्मनी र नेपालका डाक्टरबाट व्यक्तिगत खर्चमा दोलखाका ३ सय बिरामीको निशुल्क उपचार
प्रकाशित मिति : मंसिर १६, २०७५ आईतबार
जर्मनीका डाक्टर कार्ल र नेपालका डाक्टर गोकर्ण पन्थीले दोलखाको विकट गाउँमा पुगेर ३ सय बिरामीको निशुल्क उपचार गरेका छन् । मौसमको प्रतिकुलताका बाबजुत पनि उनीहरुले आफ्नै खर्चमा दोलखाका बिकट बस्तीमा पुगेर बिरामीहरुको उपचार गरेका हुन् । डाक्टर कार्ल जर्मनीबाटै आएका हुन् भने डाक्टर गोकर्ण पन्थी बुटवलमा सकृय छन् ।
दोलखाको कालिञ्चोकको बेगुम्पा र बेगु थामिचाकुमा संचालित एकहप्ते स्वास्थ्य शिविरका क्रममा उनीहरुले हातगोडा र जोर्नीहरु दुख्ने बुढाबुढीहरु, घाउ खटिरा भएका बच्चाबच्चीहरु, खोकी लागेका बिरामीहरुको उपचार गरेका थिए । त्यहाँ उपचार हुन नसक्ने कैयन बिरामीहरुलाई भने उचित स्वास्थ्यसंस्थामा जान रिफर गरिएको थियो ।
उपचारमा संलग्न डाक्टर गोकर्ण पन्थी भन्छन् – ‘अत्यन्तै चिसो बढेको रहेछ । हामीले कहिले टेन्टमा र कहिले टिनका छाना भएका चिसा टहरामा बसेर बिरामीको उपचार गर्यौं । चिसोले रातभर निद्रा नलागेपनि र आफै बिरामी हुने खतरा भएपनि बिरामीलाई सेवा गर्न पाउँदा मनमा आनन्दको अनुभव भएको छ ।’
स्वास्थ्य शिविर संचालन गरिएका दुईवटै ठाउँमा हिडेर जानुपर्ने बाध्यता रहेको छ भने बेगुम्पामा भूकम्पपछि स्वास्थ्यचौकी भत्किएर जिर्ण अवस्थामा पुगेको छ । स्वास्थ्यचौकीमा औषधी समेत खासै छैन । त्यस्तै थामिचाकुमा गाउँपालिकाको सहयोगमा स्वास्थ्यचौकीको शाखा त खोलिएको छ तर औषधी भने छैन ।
डाक्टर पन्थी भन्छन् – ‘जनताको पहुचमा स्वास्थ्य सुविधा छैन । हामीले बाँकी रहेका औषधी र टेन्टहरु पनि थामिचाकुमा रहेको स्वास्थ्य चौकीको शाखामा छाडेर आयौं ।’
स्वास्थ्य शिविर संचालनका लागि २ जना डाक्टर र ३ जना सहयोगी सहित ५ जनाको सहभागिता रहेको थियो । कालिञ्चोक गाउँपालिकाको पहलमा र सिविनको सहयोगमा स्वास्थ्यशिविर संचालन गरिएको हो । जर्मन डाक्टर त्यहाँ रहेको संस्था हेल्प नेपालको पहलमा आएका हुन् । तर उनी नेपालको मेडिकल काउन्सिलमा समेत दर्ता भएका डाक्टर हुन् ।
डाक्टरहरु व्यक्तिगत खर्चमा नै आएको र अधिकांश औषधीपनि व्यक्तिगत खर्चमा जर्मनीबाटै किनेर ल्याएर जनाइएको छ । उनीहरुले विगत ४ बर्षदेखि हरेक बर्ष स्वास्थ्य शिविर संचालन गर्दै आएका छन् ।
