मेरिल्याण्ड राज्यको हाउस अफ डेलिगेट्समा नेपाली मुलका भण्डारीको अग्रता
प्रकाशित मिति : कार्तिक २१, २०७५ बुधबार
अहिलेसम्मको मत परिणाम अन्तरगत अमेरिकाको मध्यावधी चुनावमा मेरिल्याण्ड राज्यको हाउस अफ डेलिगेट्समा उम्मेदवारी दिएका नेपाली मुलका अमेरिकन नागरिक ह्यारी भण्डारीले अग्रता कायम गरेका छन् । ३ जना निर्वाचित हुने मेरिल्याण्ड हाउस अफ डेलिगेट्स डिस्ट्रिक्ट ८ मा भण्डारीले दोश्रो नम्बरमा अग्रता कायम गरिरहेका छन् ।
अहिलेसम्मको अवस्था हेर्दा डेमोक्रेटिक उम्मेदवार एरिक ब्रोमवेलले २१ हजार ३ सय ६३, डेमोक्रेटिक उम्मेदवार ह्यारी भण्डारीले २० हजार ९ सय ७७ र रिपब्लिकन उम्मेदवार जोसेफ बोटेलरले २० हजार ८१ मत ल्याएका छन् । अरु २ जना रिपब्लिकन र एकजना डेमोक्रेटिक उम्मेदवारहरुले ब्रोमवेल, भण्डारी र बोटेलरलाई पछ्याइरहेका छन् ।
अमेरिकी मुलधारको राजनीतिमा नेपाली मुलका अमेरिकी नागरिकले चुनाव जितेको इतिहास नभएको सन्दर्भमा भण्डारीले चुनाव जितेमा अमेरिकामा नयाँ इतिहास कायम हुनेछ । प्राइमरी चुनावमा डेमोक्रयाटिक पार्टीको तर्फबाट चार जना मध्येबाट तिन जना उम्मदेवार बिजयी हुनुपर्नेमा ह्यारी ५ हजार ७ सय ६५ भोट ल्याएर दोश्रो स्थानमा बिजयी भएका थिए ।
नेपालको पर्वत जिल्लामा जन्मेका भण्डारी डेमोक्रयाट पार्टीमा करिब दशक बढी देखी सक्रिय छन् । भण्डारीले चुनाव जितेमा एउटा नेपाली मुलको युवा अमेरिकी राज्यको संसद भवन छिर्नेछ ।
सन् २०१४ को चुनावमा यो क्षेत्रबाट दुईजना रिपब्लिकन र एकजना डेमोक्रेटिक उम्मेदवार विजयी भएका थिए ।
