अमेरिकामा कागजपत्रविहिनलाई स्पोन्सर गर्न खोज्ने ४० भन्दा बढी पक्राउ
प्रकाशित मिति : आश्विन ६, २०७५ शनिबार
अमेरिकी इमिग्रेशन एण्ड कस्टम इन्फोर्समेन्ट आइसले कागजपत्रविहिन बालबालिकाहरुलाई स्पोन्सर गर्न खोज्ने ४० जना भन्दा धेरैलाई पक्राउ गरेको छ । अमेरिकामा प्रवेश गरेर संघीय हिराशतमा राखिएका कागजपत्रविहिन बालबालिकाहरुलाई उनीहरुका बाबुआमा, आफन्त र साथीहरुले स्पोन्सर गर्न पाउने प्रावधान रहेको छ ।
तर बालबालिकाहरुलाई स्पोन्सरका लागि दिएको सुचना प्रयोग गरेको आइसले स्पोन्सर गर्नेहरु कागजपत्रविहिन भए नभएको पत्ता लगाउन थालेको छ । यदि स्पोन्सर गर्नेको कागजपत्र नभएको खण्डमा उनीहरुलाई नै पक्राउ गरेर देशनिकालाको प्रकृयामा लैजान थालिएको छ ।
आइसका कार्यकारी डेपुटी डाइरेक्टर म्याथ्यु एल्बान्सले सिनेटको सुनुवाईमा यो कुराको पुष्टी गरेका हुन् । उनले ४१ जना स्पोन्सरहरुलाई पक्राउ गरिएको र उनीहरु कागजपत्रविहिन रहेको बताएका छन् । त्यसमध्ये कतिपय अपराध गरेकाहरु समेत रहेको उनको दावी छ ।
आइसको यो कदमले संघीय हिराशतमा राखिएका बालबालिकाका आमाबाबुको अमेरिकामा कागजपत्र नभएको खण्डमा उनीहरुलाई देशनिकाला हुनसक्ने त्रास बढाएको छ । जसका कारण आफ्ना छोराछोरीहरु स्पोन्सर गर्नमा समेत समस्या पैदा हुने भएको छ ।
कागजपत्रविहिनले समेत आफ्ना बालबालिकाहरु स्पोन्सर गर्न पाउने प्रावधान रहेकोमा कतिपय रिपब्लिकन नेताहरुमा यसमा परिवर्तनको माग गरेका छन् । कागजपत्र हुनेहरुलेमात्र आफ्ना बालबालिकाको स्पोन्सर गर्न पाउनुपर्ने उनीहरुको माग छ ।