‘अमेरिकी प्रहरीबाट नेपाली युवा मारिएको घटना अन्यायपूर्ण’
प्रकाशित मिति : भाद्र १५, २०७५ शुक्रबार
अमेरिकाको कोलोराडो वेष्टमिनिस्टरमा प्रहरीको गोलीबाट नेपाली युवा बिरेन्द्र ठकुरी मारिएको घटना ‘अन्यायपूर्ण’ रहेको एनआरएनएले जनाएको छ । एनआरएनए कोलोराडो च्याप्टरले श्रद्धाञ्जली जारी गर्दै घटना ‘अन्यायपूर्ण’ रहेको जनाएको हो ।
पीडितलाई राहत तथा न्याय दिलाउन पहल भइरहेको र थप जानकारी ठकुरी परिवारका तर्फबाट नियुक्त वकिलसँग सल्लाह गरेर सार्वजनिक गरिने एनआरएनए कोलोराडोले जनाएको छ ।
कोलोराडोको रान्च रिजर्भ पार्कवे र फेडेरल बोलुभर्डमा गत शनिबार बेलुका भएको घटनामा प्रहरीले नेपाली युवामाथि गोली हानेको थियो । सडकको छेउमा केही व्यक्तिहरु झगडा गरिरहेको खबर पाएपछि बेलुका पौने ९ बजेतिर त्यहाँ प्रहरी पुगेको थियो ।
प्रहरी पुग्दा सडकको छेउमा केही व्यक्तिहरु रहेका थिए । प्रहरी आएपछि मृतक ठकुरी र उनका दाजु प्रहरी भएतिर अगाडि बढेका थिए । दुईजना व्यक्ति आफूतिर अगाडि बढेको र उनीहरुले आदेशको पालना नगरेको भन्दै प्रहरीले गोली चलाएको थियो ।
गोली लागेका बिरेन्द्र ठकुरीलाई अस्पतालमा मृत घोषणा गरिएको थियो भने उनका दाजुलाई प्रहरीले हिराशतमा लिएको थियो । तर उनलाई राती अबेर प्रहरीले रिहा गरेको थियो ।
ठकुरीलाई न्याय दिलाउने कार्यमा र परिवारलाई राहतका लागि यो लिंकमा क्लिक गरेर सहयोग गर्न सक्नुहुनेछ ।
फोटो श्रोत : फेसबुक र गोफण्डमी