Follow @khasokhasmag

‘म अनुहारले नेपाली जस्तो नदेखिएपनि भित्रबाट नेपाली हुँ’


प्रकाशित मिति : श्रावण १७, २०७३ सोमबार

 

नेपालका लागि पूर्व अमेरिकी राजदूत स्कट ए डेलिसीले आफू अनुहारले नेपालीजस्तो नदेखिएपनि भित्रबाट भने नेपाली नै रहेको बताएका छन् । डेलिसी सन् २०१० देखि सन् २०१२ मा नेपालका लागि अमेरिकी राजदूत थिए ।

शुक्रबार न्युयोर्कका नेपालीहरुबीच बोल्दै उनले भने – ‘म अनुहारले नेपाली जस्तो नदेखिन सक्छु तर म भित्रबाट नेपाली हुँ । म नेपाल र नेपालीलाई माया गर्छु । म नेपालको लागि काम गर्न चाहन्छु ।’ डेलिसीले नेपाल र नेपालीप्रति माया र सद्भाव प्रकट गरिरहँदा कार्यक्रममा उपस्थीत नेपालीहरुले ताली ठोकेका थिए ।

सोरवे फाण्डेशन स्थापना गरेर सामाजिक कार्यमा सकृय डेलिसी न्युयोर्कमा आगामी अगस्तमा हुने कार्यक्रमबारे जानकारी दिन न्युयोर्कमा आएका हुन् । डेलिसीसँगको पत्रकार भेटघाट र सामुदायीक अन्तरकृया न्युयोर्कको ज्याक्सनहाइटमा रहेको हिमालयन याकमा गरिएको थियो, जसका लागि एनआरएन आईसीसीका तर्फबाट अमेरिका क्षेत्रका संयोजक सोनाम लामाले सहयोग गरेका थिए ।

डेलिसीको सोरवे फाउण्डेशन नेपालमा कृयाशिल रहेको छ । बलिया विद्यालय र घरहरु निर्माण भन्दा बिपत्तिका लागि तयारी महत्वपूर्ण विषय रहेको स्वीकार्दै फाउण्डेशनले नेपालमा त्यस क्षेत्रमा काम गर्दै आएको छ । फाउण्डेशनले भूकम्पबाट टुहुरा भएका बालबालिकाहरुलाई सहयोग गरिरहेको छ भने भूकम्पपीडितका आवास, विद्यालय निर्माण, स्वास्थ्य सहयोग, महिला तथा बालबालिकालाई तस्करीमा पर्नबाट संरक्षण लगायतका क्षेत्रमा काम गरिरहेको छ ।

डेलिसीको सामाजिक कार्यलाई सघाउनका लागि न्युयोर्कमा सुरसुधाको कन्सर्ट हुन लागेको हो । कार्यक्रमबाट संकलित रकम नेपालको पुरातात्विक संरचनाको पुननिर्माण र नेपालमा भ्रमण गर्न लागेका अमेरिकन घाइते हिरोहरुको सहयोगमा जाने बताइएको छ । कार्यक्रम न्युयोर्कको अलावा शिकागो, डलास, पिट्सबर्ग, स्प्रींगफिल्ड, वासिंटन डिसी, बाल्टिमोर लगायतका क्षेत्रमा पनि हुनेछ ।

घाइते हिरोहरुले आगामी सेप्टेम्बरमा विश्व पर्यटन दिवशको अवशर पारेर नेपालको भ्रमण गर्ने र जीवनकै एकपटक प्राप्त हुने भ्रमण अनुभव हासिल गर्ने जनाइएको छ । अफगानिस्तानमा दुबै खुट्टा गुमाएका स्टेफान, सेप्टेम्बर ११ को हमलामा पेन्टागनमा साथीहरुको उद्दार गरिरहदा खुट्टा गुमाएकी सारा, बोष्टन म्याराथन बम हमलामा खुट्टा गुमाएकी एड्रियाना हस्लेट लगायत १० जना अमेरिकी भेट्रान र घाइतेहरु नेपालमा जाने भएका छन् । यसले नेपालमा रहेका ५ लाख अपांगता भएकाहरुलाई प्रेरणा मिल्ने विश्वास लिइएको छ ।

अमित शाहले संचालन गरेको अन्तरकृया कार्यक्रममा सुमन तिम्सिनाले आगामी सुरसुधा कार्यक्रमबारे थप जानकारी दिएका थिए । कार्यक्रममा गिरिजा गौतमले उपस्थीतहरुलाई टिकट बिक्रीको जिम्मा लिन अनुरोध गरेपछि उपस्थीत नेपालीहरुले ठूलो संख्यामा सुरसुधा कन्सर्टको टिकटको जिम्मा लिएका थिए ।

कार्यक्रमका थप तस्विरहरु यहाँ हेर्नुहोला । 

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com