KHASOKHAS ON GOOGLE NEWS CoronaVirus Fact Checking CoronaVirus News Update CoronaVirus: Stories of Hope CoronaVirus Resource Center File UI or PUA Claim Donate to Khasokhas

‘अब दोश्रो र तेश्रो एल्बमको तयारीमा छु’ : सुरेश वाग्ले , गजलकार

तपाईको साहित्यीक यात्राको बारेमा बताईदिनुस्न ?

साहित्यीक क्षेत्रमा कलम चलाउन थालेको २० वर्षभयो । भर्खरै बजारमा आएको‘तिमी साथ भएपछि’ एल्बममा समाबेस गरिएका गजलहरु केही १२ वर्ष र केही १५ वर्षपहिला लेखिएको र म्युजिक कम्पोज भैसकेका हुन ।

कतिपय मानिसहरु मलाई अमेरिका गयो, पैसा कमाएर र गितकार बन्यो भन्ने बुझेका छन् तर,त्यो विल्कुलै होइन । यो मैले धेरै पहिलादेखि गरेको काम हो । यत्तिकै बसेको थियो ,अहिले बाहिर ल्याएको मात्र हो । २०५९÷०६० सालमा म काठमाडौँ बस्दा गजलगृह नेपाल संस्था मार्फत् गजलको क्षेत्रमा धेरै काम गरेको थिएँ । त्योबेला ‘पलाँस’ नामक गजल पत्रिका प्रकाशन गर्दथ्यौँ ।

पलाँस फुल मन्दिरमा चढ्दैन । प्रतिकात्मक रुपमा हेपिएको फुललाई हामीले रोजेका थियौँ । गजलगृह मार्फत् हरेक दुई महिनामा गायक गायीकाहरु बोलाएर सांगितिक कार्यक्रम पनि आयोजना गर्ने गर्दथ्यौँ । गजल लेखेर मात्र हुँदैन, यसलाई संगितसँग जोड्नुपर्छ भन्दै गजल सांगितक कार्यक्रम धेरै गर्यौँ । त्योबेला आनन्द कार्की, जगदिश हमाल, शिव परियार, अञ्जु पन्त र मनोज……ले हाम्रो कार्यक्रममा आएर गजल गाउनुहुँन्थ्यो ।

साहित्य क्षेत्रमा स्कुल पढ्दादेखिनै लगाब थियो । त्योबेला कबिताहरु लेख्ने गर्दथेँ भने अहिलेसम्म निरन्तर रुपमा गजललेखिरहेको छु । २०५४÷०५५ को कुरा हो । विरगंजबाट एसएलसी दिएपछि डाक्टर घनश्याम न्यौपानेसँग भेट भयो । त्योबेलादेखि कलम चलाउन थालेको हुँ । न्यौपाने सरले गजलमा अहिले पीएचडी गर्नुभएको छ । मैले निरन्तर गजल रचना गरेपनि किताब भने प्रकाशन गरेको छैन । त्योबेला मेरा रचनाहरु मधुपर्क, गोरखापत्र र कान्तिपुरमा पनि कहिले काहीँ प्रकाशन हुने गर्दथेँ । अमेरिका आएपछि पनि लेखनकार्यलाई निरन्तरता दिएको छु । तर, अरुले जसरी मैले बाहिर ल्याउने गरेको छैन् ।

पन्ध्रवर्ष पहिला लेखिएका गजल अहिले आएर एल्बमको रुपमा बाहिर ल्याउँनु भयो ? कारण केही थियो कि ?

मेरा हजारौँ रचनाहरु छन् ,तर म झट्ट प्रकाशनमा ल्याउँदैन । त्यसको लागि आफैभित्र पास भएर आउन धेरै गाह्रो हुन्छ । हरेक रचनाहरुलाई प्रकाशनमा ल्याउनुभन्दा पहिला धेरै सोच विचार गर्ने र छान्ने गर्दछु । यो मेरो पहिलेदेखिको स्वभाव हो । लामो समय साहित्य क्षेत्रमा काम गरेको हुनाले, गजलको किताब आएन भन्नै शुभचिन्तकहरु प्रश्न गर्नुहुन्छ । नेपाली गजल क्षेत्रमा धेरै गजलका किताबहरु प्रकाशन भैसकेका छन्, मेरो विचारमा एउटा अर्को गजलको किताब थप्नुभन्दा ढिलो भएपनि राम्रो र उत्कृष्ट आउनुपर्छ भन्ने मान्यता राख्दछु । जुन गजलले केही अर्थ राख्न सकोस् । न कि एल्बम निष्कियो भनेर आफै हेर्ने÷सुन्ने, आफै मख्ख पर्ने मात्र होइन ! समाजमा छाप छोड्न सकोस् भन्ने हो । जसकोकारण एल्बम बजारमा आउन ढिलाभयो ।

Loading...

अहिलेसम्म कति गजल लेखिसक्नु भयो ?

लिपिबद्ध नभएका धेरै छन् तर, मलाई मन परेका र लेखिएका डेढसयभन्दा बढी नै होलान् ।

भर्खरै बजारमा आएको ‘तिमी साथ भएपछि’ कतियौँ एल्बम हो ? यसमा के कस्ता गजलहरु रहेका छन् ?

यो मेरो पहिलो एल्बम हो । हतारमा निकाल्नुभन्दा समय लगाएर राम्रो उत्पादन गरौँ भन्ने सोच हो । कति किताब र कति गीत बाहिर आएभन्दा पनि बाहिर आएका गीतले कति राम्रो प्रभाव पार्न सक्यो भन्ने मुख्य कुरा हो । म त्यही अनुसार काम गरेको छु ।

‘तिमी साथ भएपछि’को एल्बममा समाबेस सबै गजलहरु म, कलेज पढ्दा लेखेका हुन । यसमा तपाई माया प्रेमका कुरा पाउनुहुन्छ ।


यो एल्बममा को—को कलाकारको आवाज र कति वटा गजल सुन्नपाइन्छ ?

यसमा १० वटा गजल समाबेस गरिएको छ । एउटै गजल, महिला र पुरुषको स्वरमा छुट्टा छुट्टै रहेको छ । एउटा गजल दोहोरीएको हुनाले संख्यामा १० छ भने गजल ९ वटा भन्दा हुन्छ । शब्द एउटै भएपनि गाउने तरिका र धुन फरक पाउनुहुन्छ । तिमी साथ भएपछि भन्ने एल्बमको पहिलो गजल हो । यो अहिले यूट्युमा १० लाखभन्दा धेरै हेरिएको छ । यही गजललाई हामीले महिला र पुरुष दुबैको स्वरमा एल्बममा समाबेस गरेका छौँ । यो एल्बमा तपाई, उदय शोताङ,मानिला शोताङ, जगदिश हमाल,मनोजराज शिवाकोटी, अञ्जु पन्त, हरी लम्साल,शिव परियार,मदन गोपाल,कृष्ण श्रेष्ठ, टिका प्रसाई र नेपाल आइडलका बिजेता बुद्ध लामाको सुमधुर स्वरमा सुन्नपाउनु हुनेछ । साथै चारवटा गजलको भिडियो पनि तपाई हेर्न सक्नुहुन्छ ।

तपाई आफै गाउनु भएन ?

छैन,छैन । त्यता मैले सोचेकै छैन । हरेको आ—आफ्नो क्षमता र कला हुन्छ मेरो कला लेख्ने मात्र हो । कसै—कसैको राम्रो स्वर हुन्छ उहाँहरुले गाउनु भएको हुन्छ ।

साहित्य सृजनामा परिस्थिति र परिवेशले कत्तिको फरक पार्दोरहेछ ?

परिस्थिति र परिबेशले साहित्य सृजनामा अवश्य पनि फरक पार्दछ । जिवनको भोगाईबाट साहित्य सृजना हुने न हो ।

तपाईको रुची मात्र हो कि ? साहित्यलाई निरन्तरता दिने योजनामा हुनुहुन्छ ?

रुची मात्र हो भन्दै एउटा एल्बम निकालेर छोड्ने पटकै सोच छैन । नेपालमा गजलको क्षेत्रमा सकेको योगदान पुर्याउनुपर्छ भन्दै गजलगृह नेपाल, स्थापना गरेका थियौँ । त्योेबेला गजल भनेर आउँथ्यो तर, गित र गजलको फरक हुँदैनथ्यो । हामीले त्योबेला गीत र गजल फरक हो भन्ने कुरा स्थापित गरेका थियौँ । सुरु गर्दा केही सपनाहरु थिए, अहिले पनि जिवितनै छन् ।
अहिले म तीनवटा एल्बमको तयारी मै छु । पहिलो बजारमा आयो । दोस्रो र तेस्रो पनि तयारी मै छन् । केही समयको फरकमा मैले बजारमा ल्याउँदै छु । दोस्रो एल्बमको केही गीत रेकड् भैसकेका छन् । दोस्रोमा लोक, गजल र पप गितहरु सुन्न पाउनुहुनेछ भने तेस्रो गजल मात्र हुनेछ ।

रोयल्टीको कुराले नेपाली बजार तातेको छ । तपाई यसमा के भन्नुहुन्छ ?

रोयल्टी त पाउनुपर्छ । असलि सर्जक भनेको रचनाकार र संगितकार हुन । तर उनीहरुको नाम नै आउँदैन । कस्को गित भन्दा जसले गाएको हो,उसैको भन्ने गरिन्छ । गायकहरुले कन्सर्टहरुबाट पैसा पाउँछन् तर त्यहाँ रचनाकार र संगितकारलाई दिइँदैन । रोयलिटिको असलि हकदार भनेका रचनाकार र संगितकार हुन । नेपालमा यसको सुरुवात हुन थालेको छ । खुशी लागेको छ ।

साहित्य सृजना गर्ने काम कत्तिको सजिलो कुरा हो ?

सजिलो काम हो । आउँछ लेख्ने न हो । यसमा बल गरेर हुँदैन । यो दिमागमा कतिबेला फूर्छ भन्ने नै हुँदैन । काम गर्दा गर्दै, हिड्दा हिड्दै, खाँदा खाँदै आउँछ, हात चुठ्यो लेख्यो । तर ,अहिले फोन छ, दिमागमा क्लिक हुन बित्तिकै रेकर्ड गर्छु र पछि त्यसलाई मिलाउँछु । गजलको पहिलो दुई लाइन राम्रो फूर्यो भने बाँकी पछि बसेर पुरा गर्ने हुन्छ ।

बिदेशमा खासगरी नेपाली साहित्यीक क्षेत्रमा, सृजनामा भन्दा पनि आफ्नो नाम पत्रिकामा कसरी आउने भन्ने होडबाजी चलेको चर्चा बेलाबेला हुने गर्दछ नि ?

म त्यतापट्टि दौडिन । मेरो ध्यान सृजना गर्नु मै छ । हो, तपाईले भने जस्तो पछिल्लो समय बढेर गएको छ । दुईचार जना जम्मा हुने एउटा कोठामा कार्यक्रम गर्ने तर,समाचार चाहीँ ठूलो बनेर आउँछ । अर्कोकुरा,अमेरिकामा सामान्य लेख्ने मान्छे, नेपाल आयो भने वरिष्ठ साहित्यकार हुँदो रहेछन् । वरिष्ठ साहित्यकार भनेर आफै पैसा दिएर सम्मान थाप्ने पनि यहाँ आएपछि सुने । नेपालमा केही संघ संस्थाहरुले त्यस्ता मान्छेहरुबाट पैसा लिने वरिष्ठ साहित्यकारको बगरीगुथाउँदै खादा ओडाउने र समाचार छपाई दिने धन्दा चलाउने रहेछन् । पत्रिका र टिभिमा समाचार आएको रेट नै छुट्टा छुट्टै रहेछ, म त सुनेर दंग परेँ । यी संस्थाहरुको काम भनेको बाहिरबाट को को आउँछ भन्दै कुरेर बस्ने रहेछ । यो साहित्यीक क्षेत्रमा मौलाएको विकृति हो ।

साहित्य क्षेत्रमा मात्र सम्मिलित हुनुहुन्छ कि सामाजिक कार्यमा केही गर्दै हुनुहुन्छ ?

अमेरिकामा हामीले नेपाली संगित र नृत्यको स्कुल सञ्चालन गरेका छौँ । म त्यसको अध्यक्ष छु । अहिले त्यहाँ ५० भन्दा बढी विद्यार्थीहरु रहेका छन् । यसको मुख्य उदेश्य भनेको नेपाली संस्कार र संस्कृतिलाई जोगाई राख्नु र नेपाली भाषा सिकाउनु पनि हो । बच्चाहरुलाई नेपाली भाषाको निशुल्क कक्षा पनि सञ्चालन गरेका छौँ । नेपालमा सड्कमा पुर्याईएका महिला र सड्कमै बलात्कृत भएर जन्मिएका बालबच्चाको हेरचाह गर्ने संस्थालाई आर्थिक सहयोग गर्ने गरेको छु । सामाजिक कार्य र साहित्य क्षेत्रलाई सँगसँगै अगाडि बढाउने योजनामै रहेको छु ।


भिडियो हेर्नुहोस्

Namaste Media Inc. New York, USA

Editor-in-Chief : Kishor Panthi
Deputy Editor-in-Chief : Ashmita Khadka
Executive Editor : Anil Adhikari
English Editor: Rajan Thapaliya
Editor: Deepak Pariyar
Europe Editor: Hari Krishna Panthi
Online Editors: Bikram Khatri, Aashish Khanal, Dikshya Panthi
Chief Photographer: Dipendra Dhungana
Editor (Empowerment) : Sapana Pariyar
© 2012-2020 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com
WP2Social Auto Publish Powered By : XYZScripts.com