५० हजार नहुँदा धनमतीले नौं महिनाअघि भाँच्चिएको खुट्टाको उपचार पाइनन्
प्रकाशित मिति : जेष्ठ १६, २०७५ बुधबार
बाजुराको बडिमालिका नगरपालिका ५ कोर्ध की ४१ वर्षीया धनमती बढुवाल उपचार अभावमा पीडा सहन बाध्य छिन् ।
गएको असोजमा भिरबाट ढुङ्गा खसेर खुट्टा भाँच्चिएको र पैसाको अभावमा अहिलेसम्म उपचार गर्न नपाएको धनमतीले बताइन् ।
श्रीमान मानसिंह बढुवालको तीन वर्ष पहिले भिरबाट खसेर मृत्यु भएपछि छोरा चन्द्राकुमारीसँगै बेसहारा जीवन बिताइरहेकी धनमतीले साथमा एक रुपैयाँ नहुँदा भाँच्चिएको खुट्टा जोड्न नसकेको दुखेसा गरिन् ।
खुट्टा भाँच्चिएको आठ महिनापछि गत बैशाखमा गाउँलेले जिल्ला अस्पताल बाजुरा लगिदिएको धनमतीले बताइन् । तर जिल्ला अस्पतालले यहाँ उपचार सम्भव नभएको भन्दै रिफर गरिदिएपछि आफूले उपचार नपाएको उनले बताइन् ।
श्रीमानको मृत्युपछि जेठाजु, देबरले छोरा नभएकी अपुती भन्दै हेला गरेर घरमा समेत बस्न नदिएपछि अहिले नन्द नाता पर्ने केजी खड्काको घरमा सहारा लिइरहेको धनमतीले बताइन् । दुई कक्षामा बपढ्दै गरेकी छोरीलाई भने माइतीमा पढाएको उनले बताइन् ।
धनमतीले आफ्नो उपचारमा सहयोग गरिदिन सबैसँग आग्रह गरेकी छिन् ।
जिल्ला अस्पताल बाजुराका डा. रुपचन्द्र विश्वकर्माले धनमतीको जिल्लामा उपचार सम्भब नहुने बताए । अप्रेशन गर्नु पर्ने भएकाले धनगढी, नेपालगञ्ज लिनुपर्ने बताए । ५० हजार जति भए उनको उपचार हुन सक्ने डा. विश्वकर्माको भनाइ छ ।