नेता पन्छाएर आएका विज्ञ अर्थमन्त्रीको बजेटबाट सत्तापक्षकै सांसद निराश
प्रकाशित मिति : जेष्ठ १५, २०७५ मंगलबार
प्रधानमन्त्री केपी शर्मा ओलीले धेरै भरोसा गरेर अर्थमन्त्री बनाएका डा. युवराज खतिवडाले पेश गरेको बजेटबाट सत्तारुढ नेपाल कम्युनिस्ट पार्टीका सांसदहरु निराश बनेका छन् ।
उनीहरुले गत चुनावमा तत्कालीन वाम गठबन्धनको घोषणापत्र र समृद्धिको सपनालाई उपेक्षा गरेको टिप्पणी गरेका छन् ।
सत्तापक्षका सांसदले खुलेर विरोध गर्न पनि सकेका छैनन् तर बजेटले निराश बनाएको भन्दै पार्टीभित्र असन्तुष्टि जनाउने तयारी गरेका छन् ।
बजेट वक्तव्य सुनेर बाहिरिएएका कम्युनिस्ट पार्टीका सांसदहरु निराशमात्र थिएनन्, अनौपचारिक कुराकानीमा अर्थमन्त्रीले पार्टीलाई डुबाउने चिन्ता समेत प्रकट गरिरहेका थिए ।
नेकपाको स्थायी कमिटी सदस्यसमेत रहेका एक सांसदले भने ‘पार्टीका प्रभावशाली नेताहरुलाई समेत विश्वास नगरी प्रधानमन्त्रीले समृद्धिको सपना साकार पार्ने व्यक्तिका रुपमा छानेका अर्थमन्त्रीले निराश बनाए । उनले घोषणापत्र त पढेकै रहेनछन्, प्रधानमन्त्रीको सपना पनि बुझ्न सकेको देखिएन ।’
जनतालाई आशा जगाउने खालका कुनै नयाँ र ठूला परियोजना दिन नसक्नु र विगतकै जस्तो बजेट ल्याउनुले अर्थमन्त्रीको क्षमतामा प्रश्न उठेको सत्तापक्षकै सांसदहरुको टिप्पणी छ । उनीहरुले यो भन्दा राम्रो बजेट यसअघिका अर्थमन्त्री विष्णु पौडेल र सुरेन्द्र पाण्डेको पालामा आएको स्मरण गरे ।
नेकपाका नेता तथा पूर्व उर्जामन्त्री जनार्दन शर्माले अर्थमन्त्रीबाट प्रस्तुत बजेटले समृद्धिको सपना साकार पार्न नसकेको टिप्पणी गरे । उनले बजेटमा धेरै कुरा राम्रा भए पनि मूल उद्देश्यमा अन्यौल रहेको बताए ।
‘पार्टीका प्रभावशाली नेताहरुलाई समेत विश्वास नगरी प्रधानमन्त्रीले समृद्धिको सपना साकार पार्ने व्यक्तिका रुपमा छानेका अर्थमन्त्रीले निराश बनाए । उनले घोषणापत्र त पढेकै रहेनछन्, प्रधानमन्त्रीको सपना पनि बुझ्न सकेको देखिएन ।’
पूर्वअर्थमन्त्री समेत रहेका नेकपाका नेता पाण्डले भने बजेटबारे जोगिएर प्रतिक्रिया दिए । उनले बजेटले न्युन आय भएका र तल्लो तहका मान्छेलाई सेवा सुविधा दिने कुरा गरे आर्थिक वृद्धि र रोजगारी वृद्धिमा फोकस गर्न नसकेको बताए ।
पाण्डेले भने ‘बजेटले साना निमुखा र तल्लो आर्थिक अवस्थाका मानिसको सन्दर्भमा बढी छरिएको र विस्तारित ढंगले सेवा सुविधा दिने कुरा गरेको छ । यसबाट तल्लो वर्गका मान्छे लाभान्वित हुनेछ । तर आर्थिक वृद्धि र रोजागारी वृद्धिमा अझ फोकस गर्न सक्नुपर्थ्यो । केही ठूला परियोजनामा कसरी बजेट विनियोजन भएको छ,त्यो हेरेर मात्र भन्न सकिन्छ ।’
नीति तथा कार्यक्रम आउँदा जुन उत्साह थियो बजेटले निराश बनाएको भन्दै सांसदहरुले नेतृत्वको ध्यानाकर्षण गराउने भएका छन् । बजेटमाथि छलफलपूर्व हुने संसदीय दलको बैठकमा संगठित रुपमा कुरा राख्ने तयारी सत्तापक्षका सांसदको छ ।