तीन महिनामा ५ सय १० हिंसाका घटना
प्रकाशित मिति : जेष्ठ ११, २०७५ शुक्रबार
दाइजोका कारण नेपालमा महिलामाथि हिंसाका घटना बढ्दै गएका छन् । महिला पुनस्र्थापना केन्द्र ओरेक नेपालले सार्वजनिक गरेको तीन महिनाको तथ्याङ्कले सबैभन्दा बढी दाइजो प्रथाका कारण हिंसा भएको देखाएको छ ।
महिला पुनस्र्थापना केन्द्र ओरेक नेपालले तीन महिनाको अवधीमा भएका ५ सय १० महिला हिंसाका घटना मध्ये सबैभन्दा धेरै ३२ घटना दाइजो प्रथाका कारण भएका छन् ।
दाइजोका कारण १२ जना महिलामाथि कुटपिट भएको छ । ७ जना घर निकाला भएका छन् । ७ जनालाई खान लाउन नदिने, विवाहदर्ता, जन्मदर्ता तथा नागरिकता जस्ता स्रोत सुविधाबाट बञ्चित गरिएको छ ।
४ जनामाथि मानसिक हिंसा भएको छ । १ जनाको हत्या प्रयास र १ जनाले दाइजोको कारणले नै आत्महत्या गरेको ओरेकको विज्ञप्तिमा उल्लेख छ ।
कार्यालयमा दर्ता भएका र विभिन्न पत्रपत्रिकामा प्रकाशित भएका घटनालाई आधार मान्दै ओरेक नेपालले २०७४ फागुन, चैत र वैशाखमा विभिन्न स्वरुपका ५ सय १० वटा महिला हिंसाका घटना भएको जनाएको हो । महिलामाथि आफ्नै श्रीमान र घरपरिवारबाट बढी हिंसा भएको पनि विज्ञप्तिमा उल्लेख छ ।