अमेरिकाबाटै आईजीपीको निर्देशन : तिमीहरू जाऊ, मन्त्रीसँग मै कुरा गर्छु

प्रकाशित मिति : कार्तिक ४, २०७३ बिहीबार

उपप्रधान तथा गृहमन्त्री विमलेन्द्र निधिको ठाडो आदेशमा तानिएका दुई प्रहरी उपरीक्षक (एसपी) प्रहरी महानिरीक्षक (आईजीपी) उपेन्द्रकान्त अर्यालको आदेशमा कार्यक्षेत्र फिर्ता भएका छन् । आफ्नो आदेशअनुसार अभियुक्त नछाड्ने भन्दै गृहमन्त्री निधिको ठाडो आदेशमा प्रहरी प्रधान कार्यालय तानिएका पर्साका एसपी राजुबाबु श्रेष्ठ र सिरहाका श्याम ज्ञवालीलाई आईजीपी अर्यालले बुधबारै कार्यक्षेत्रमा फिर्ता पठाएका हुन् ।

आईजीपीको अधिकारलाई चुनौती दिँदै गृहमन्त्री निधिले पर्सामा पक्राउ परेका हुन्डी कारोबारी र सिरहामा अपहरणकारीलाई कारबाही नगर्न दिएको आदेश पालना नगर्दा आईजीपी विदेशमा रहेका बेला पर्साका श्रेष्ठ र सिरहाका ज्ञवालीलाई कारबाहीस्वरूप तानिएको थियो ।

‘गृहमन्त्रीको आदेशमा उनीहरूलाई प्रधान कार्यालय तानिएको थाहा पाएपछि आईजीपी अर्यालले अमेरिकाबाटै एसपीलाई फोन गर्दै कार्यक्षेत्र जान निर्देशन दिएका हुन् । ‘तिमीहरू कार्यक्षेत्र जाऊ, गृहमन्त्रीसँग म आएर कुरा गर्छु,’ आईजीपी अर्यालको निर्देशन उद्धृत गर्दै प्रधान कार्यालयका एक अधिकारीले भने । प्रहरी नियमावलीले एसपीसम्मको सरुवा अधिकार आईजीपीलाई दिएको छ ।

आफ्नो अधिकारप्रति राजनीतिक हस्तक्षेप भयो, यसले राम्रो सन्देश गएन भन्दै आईजीपी अर्यालले दुवै एसपीलाई तत्कालै कार्यक्षेत्रमा फिर्ता गरेको ती अधिकारीको भनाइ छ । काममा राम्रो छवि बनाएका दुवै एसपीलाई आईजीपी अर्यालले मधेस आन्दोलनकै बेला जिल्ला प्रमुख बनाएर पठाएका थिए ।

आइतबार उनीहरूलाई ब्रिफिङका लागि भन्दै प्रधान कार्यालय बोलाइएको थियो । तर, उनीहरूलाई न त ब्रिफिङ लिइयो न त गृहमन्त्रीले नै भेट दिए । गृहमन्त्रीलाई भेट्न निमित्त आईजीपी प्रहरी अतिरिक्त महानिरीक्षक (एआईजी) विज्ञानराज शर्मासँगै पुगेका दुवै एसपीले गृहसचिव लोकदर्शन रेग्मीलाई भेटेर फर्केका थिए । राजनीतिक हस्तक्षेप नगर्ने भन्दै आएका निधिले धनुषाका एसपी रामदत्त जोशीलाई सरुवा गरेरै छाडेका थिए । पहिलोपटकको हस्तक्षेप सफल भएपछि मन्त्रीले दोस्रोपटक आईजीपी काठमाडौंमा हुँदै सरुवा गर्न निर्देशन दिएका थिए ।

एसपी श्रेष्ठ र ज्ञवालीले आफूले भनेको नमानेकै कारण सरुवा गर्न दबाब दिए पनि आईजीपी अर्यालले असम्भव भन्दै अमेरिका गएपछि निमित्त प्रमुख शर्मालाई दबाब दिएर प्रधान कार्यालय झिकाइएको थियो । उनीहरू काठमाडौं आएलगत्तै व्यापक विरोध भएको थियो । ‘राजनीतिक दलको भ्रातृ संगठन जसरी चल्ने यो २०५० सालतिरको प्रहरी संगठन होइन, अहिले ०७३ सालको प्रहरी संगठन हो, आईजीपीको अडान सही छ सरुवा भए पनि उनीहरूको नियमित सरुवा हुन्छ, आकस्मिक हुँदैन,’ प्रधान कार्यालयका अर्का अधिकृतले भने ।

एसपी श्रेष्ठसहितको टोलीले १६ असोजको राति वीरगन्ज उपमहानगरपालिका–७ रेशमकोठीस्थित सन्तोष जैनको घरबाट ठूलो रकमसहित हुन्डी कारोबारी सन्तोष जैन, उनका छोरा अंकुर जैन, श्रीमती उषा जैनसहित पाँचजनालाई पक्राउ गरेको थियो ।

अवैध हुन्डी कारोबारी पक्राउ परेलगत्तै गृहमन्त्री निधिले छोड्न आदेश दिएका थिए । वीरगन्जका व्यवसायी तथा पूर्वसांसद ओमप्रकाश शर्माको दबाबमा गृहमन्त्रीले हुन्डी कारोबारीलाई छाड्न र कुनै मुद्दा नचलाउन आदेश दिएका थिए । तर, एसपी श्रेष्ठले जागिर गए पनि छाडिन्नँ भन्दै मुद्दा चलाउने बताएपछि उनको सरुवाका लागि गृहमन्त्री निधिले आईजीपीलाई आदेश दिएका राजधानीमा खबर  छ । आईजीपीले नमानेपछि अमेरिका रहेका बेला निमित्त आईजीपी शर्मालाई धम्की दिएर दुवै एसपीलाई आइतबार प्रधान कार्यालयमा हाजिर हुन लगाइएको थियो ।

त्यस्तै, सिरहाका प्रहरी प्रमुख ज्ञवालीले इन्जिनियर देवानन्द मण्डलको अपहरणमा संलग्न रहेको पाइएपछि माओवादी नेता तथा पूर्वमन्त्री विश्वनाथ साहलाई पक्राउ गर्ने टोली खटाएका थिए । पूर्वमन्त्री साह, माओवादी केन्द्रका नेता रामकुमार यादव, श्रवण यादव, शिवकुमार कापर र अन्य ६ जनाविरुद्द मुद्दा दर्ता भएको थियो । सोही कारण उनलाई पनि कारबाहीस्वरूप तानिएको थियो । तर, आईजीपीले तत्कालै कार्यक्षेत्र जान निर्देशन दिएर फिर्ता पठाएका हुन् ।

KHASOKHAS EDITORIAL TEAM

Editor-in-Chief : Kishor Panthi
Deputy Editor-in-Chief : Ashmita Khadka
Executive Editor : Anil Adhikari
English Editor: Rajan Thapaliya
Editor: Deepak Pariyar
Editor (Business/US Politics) : Suresh Shahi
Multimedia Editor/Presenter : Kiran Marahatta
Europe Editor: Hari Krishna Panthi
Online Editors: Suraj Ghimire, Bikram Khatri, Aashish Khanal, Dikshya Panthi
Chief Photographer: Dipendra Dhungana
Editor (Empowerment) : Sapana Pariyar

KHASOKHAS TEAM

Int. Representative: KP Neupane(Jackson)
Resource Person: Bishwa Bahadur Shah
Goodwill Ambassador: Yam Baral

Contact Us

© 2021 KHASOKAHS. All Rights Reserved. Namaste International Media Group (worldwide) and Namaste Media Inc (USA)
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com