प्रदेश नम्बर ३ को प्रदेशसभाको पहिलो बैठक हेटौंडामा आज बस्दै
प्रकाशित मिति : माघ १८, २०७४ बिहीबार
माघ १८, काठमाडौं । प्रदेशसभाको पहिलो बैठक आज बस्दैछ । पहिलो प्रदेशसभाका रुपमा प्रदेश नम्बर ३ को बैठक आज बस्न लागेको हो ।
प्रदेश नम्बर ३ को अस्थायी राजधानी हेटौंडामा दिउँसो १ बजेपछि शुरु बैठकमा सहभागी हुन प्रदेश नम्बर तीनका अधिकांश सांसद हेटौंडा पुगिसकेका छन् ।
देश संघीय संरचनामा गइसकेपछि पहिलोपटक प्रदेशसभाको बैठक बस्न लागेको हो । सभामुख चुन्न बाँकी रहेकाले प्रदेश नम्बर ३ का ज्येष्ठ सदस्य डोरमणी पौडेलले बैठकको अध्यक्षता गर्नेछन् ।
प्रदेशसभा बैठकका लागि बसेको सर्वदलीय बैठकले पाँच वटा कार्यसूची तयार पारेको छ ।
जसअनुसार प्रदेश प्रमुख अनुराधा कोइरालाले संसद् अधिवेशन आह्वान गरेको सूचनाको विवरण प्रदेशसभाका ज्येष्ठ सदस्य पौडेलले प्रस्तुत गर्नेछन् ।
यस्तै, सातवटा दल र एक जना स्वतन्त्र सांसदले बोल्ने कार्यक्रम छ । प्रदेशसभा सभामुखका लागि यही माघ २९ गते चुनाव गर्ने मिति तोक्ने प्रस्ताव पनि आजको बैठकमा राखिने कार्यसूची छ ।
प्रदेशसभाको अधिवेशनमा सभामुखको अनुपस्थितिमा कार्य सञ्चालन गर्न प्रदेश सदस्यका तर्फबाट सदस्य मनोनित गर्ने तथा प्रदेशसभा अधिवेशनको अन्तरिम कार्यविधिको सूची प्रस्तुत गर्ने निर्णय पनि सर्वदलीय बैठकले गरेको छ ।