गोबिन्द केसीका पक्षमा काठमाडौमा र्याली
प्रकाशित मिति : आश्विन १५, २०७३ शनिबार
चिकित्सा शिक्षा सुधारको माग राख्दै नवौं अनशनमा बसेका डा. गोविन्द केसीको समर्थनमा माइतिघरदेखि नयाँ बानेश्वरसम्म र्याली निकालिएको छ । डा केसीसँग विगतमा गरिएका सम्झौता पुरा गर्न र उनले उठाएका सबै माग पुरा गर्न सरकारलाई दबाब दिन ¥याली निकालिएको हो ।
डा. केसी अख्तियार प्रमुखलाई महाअभियोग लगाउनुपर्ने, मनमोहन प्रतिष्ठान विधेयक संसदबाट फिर्ता लिनुपर्ने, चिकित्सा शिक्षा विधेयक संसदको यही शेसनमा पास गर्नुपर्ने, चिकित्सा शिक्षा बनेपछि मात्र नयाँ सम्बन्धन दिनुपर्ने माग राखि अनशनमा छन् । सरकारले मनमोहन विधेयक फिर्ता लिने निर्णय गरिसकेको छ भने चिकित्सा शिक्षा विधेयक यही शेसनमा पास गर्ने प्रतिवद्धता जनाइसकेको छ ।
र्यालीमा स्वतःस्फूर्तरुपमा सयौं सर्वसाधारण सहभागी थिए । र्यालीमा सहभागी भएकाहरुले अख्तियार दुरुपयोग अनुसन्धान आयोगका प्रमुख लोकमान सिंह कार्कीलाई कारवाही गरि अख्तियारको मर्यादा कायम राख्न माग गरेका थिए ।उनीहरुले प्रा.डा. केसीले उठाउँदै आएका सम्पूर्ण माग तत्काल पूरा गर्न माग गरेका थिए ।