ठेकेदारले सम्झौता विपरीत उठाए सडक कर, सवारीधनी मर्कामा
प्रकाशित मिति : पुस १६, २०७४ आईतबार
पुस १६,पाल्पा । पाल्पाका सडकमा ठेकेदारले अवैध रुपमा सडक कर उठाएपछि सवारीधनी मर्कामा परेका छन् । जिल्लाबाट बल्ढेङगढी, सत्यवती र जुठापौवा जाने मोटरबाटोमा ठेकेदारले अबैध रुपमा सडक कर उठाएको भेटिएको छ ।
स्थानीय ठेकेदार चन्द्रबहादुर सिंजालीले सालझण्डीदेखि साविक गाविससम्म पुग्ने सडकअन्र्तगत जोगदमारमा सडक कर उठाउने गरी टेण्डर भएको भए पनि ठेकेदारले अन्य सडकमासमेत ढाट राखेर कर उठाएका छन् ।
जोगदमारमा मात्र नभई अर्घाखाँची हुँदै ढोरपाटन जाने सडकमा समेत सिंजालीले युवाहरु परिचालन गरी सडक कर लिने गरेको स्थानीयवासी गोविन्द थापाले बताए । थापाले भने( ‘अबैध रुपमा गाडीवालाहरुसँग रकम उठाइएको छ, तर यसको नियमन कसले गर्ने हो थाहा भएन ।’
धेरै जसो गाडीवालाहरु पीडित भएपनि खुलेर प्रतिक्रिया दिन आनाकानी गरे । त्यस बाटोमा चल्ने गाडी चालक निरज अघिकारीले ठेकेदारले ढोरपाटन सडक अन्र्तगत इटिहामा साना सवारीसाधनलाई ४० रुपैंया र ठूला सवारीलाई ५० रुपैंया लिने गरेका बताए । जोगदमारमा प्रयोग गर्ने रसिद नै इटिहामा पनि प्रयोग गर्ने गरिएको छ ।
स्थानीय बासिन्दाले साविक जिल्ला विकास समितिका केही पदाधिकारीसँगको मिलेमतोमा चन्द्रबहादुरले मनपरी सडक कर उठाएका आरोप लगाएका छन् ।
ठेकेदार चन्द्रबहादुरले पनि दुईतर्फ सडक कर उठाएको स्वीकार गरेका छन् । उनले भने – ‘सत्यवती जुठापौवा जाने जीपहरु यो बाटोबाट पनि चल्छ । त्यसैले कर उठाइएको हो ।’
तर स्थानीयले ढोरपाटन सडकमा चल्ने सबै सवारीसाधनलाई कर लिने गरेको बताएका छन् ।
गैरकानुनी प्रक्रियाले कर लिएको गरेको भन्दै स्थानीयवासीले जिल्ला समन्वय समिति पाल्पालाई समेत जानकारी गराएका छन् । वार्षिक १ लाख ५० हजार रुपैयाँमा उक्त एकल रुटको टेण्डर भएको थियो ।