निर्वाचन आयोगमाथि लगायो एमालेले गंभिर आरोप
प्रकाशित मिति : पुस १६, २०७४ आईतबार
काठमाडौं, १६पुस । नेकपा एमालेले निर्वाचन आयोगको नियत गलत भएको गंभिर आरोप लगाएको छ । उसले ताजा जनादेश अनुरुप नयाँ सरकार गठनमा सत्तापक्ष र आयोग असहयोगी भूमिकामा प्रस्तुत भएको आरोप लगाएको हो ।
आयोगले ‘कतैको दबाब’मा परेर प्रतिनिधिसभाको निर्वाचन परिणाम रोकेर राखेको एमालेको बुझाई रहेको छ । संबैधानीक निकायमाथि राजनीतिकदलले शंका र आरोप लगाउने कार्यलाई असोभनिय मानिएको भए तापनि एमालेका कानुन बिज्ञ मानिएका एक नेताले आयोगमाथि गंभिर आरोप लगाएका हुन् ।
प्रतिनिधिसभाको निर्वाचन सम्पन्न भएको एक महिना पुग्न लाग्दा पनि आयोगले समानुपातिकतर्फको नतिजा लुकाएर राखेको एमाले स्थायी कमिटी सदस्य तथा पूर्वसभामुख सुवास नेम्वाङले बताए । आयोगको ढिलाई अचम्म लाग्दो रहेको उनले टिप्प्णी गरे ।
नेम्वाङले समानुपातिक सिट वितरणसँगै सम्पूर्ण निर्वाचन परिणाम राजपत्रमा प्रकाशित गरेर राष्ट्रपतिलाई बुझाउनुपर्नेमा आयोगले आलटाल गरिरहेको बताए ।
निर्वाचन आयोगले भने राष्ट्रियसभा निर्वाचनपछि मात्र समानुपातिक सिट बाँडफाँट गर्ने तयारी गरेको छ ।
नेम्वाङले प्रधानमन्त्री शेरवहादुर देउवा अझै दुई चार महिना आफ्नो सत्ता लम्ब्याउने खेलमा लागेको आरोप समेत लगाएका छन् ।
राष्ट्रियसभाको निर्वाचन पनि मै गराउँछु भन्नु, निर्वाचन आयोगलाई परिणाम घोषणाबाट रोक्नु जस्ता गतिबिधिले सत्ता लम्ब्याउने चाहना प्रष्ट भएको उनले बताए ।