सरकारी कामकाजमा गुरुङ भाषालाई प्राथमिकता
प्रकाशित मिति : पुस १४, २०७४ शुक्रबार
नेकपा (एमाले)का सचिव पृथ्वीसुब्बा गुरुङले सरकारी कामकाजमा गुरुङ भाषालाई प्राथमिकतामा ल्याइने जिकिर गर्नुभएको छ ।
तमु ल्होसारका अवसरमा बेंसीशहरमा आयोजित शुभकामना आदानप्रदान कार्यक्रममा नवनिर्वाचित प्रदेशसभा सदस्य गुरुङले ४ नं प्रदेश तमु जातिको बाहुल्य क्षेत्र रहेकाले तमु भाषालाई सरकारी कामकाजमा प्रयोगमा ल्याउन र तमु जातिको पहिचान रक्षाका लागि आफू लागिपर्ने बताउनुभयो ।
नेता गुरुङले ४ नं प्रदेशमा गुरुङसँगै मगर जातिको भाषालाई पनि कामकाजी भाषामा प्रयोगमा ल्याइने प्रतिबद्धता व्यक्त गर्दै प्रदेशको नामकरण जातीय र भौगोलिक पक्ष दुवै मिलाएर गर्न सकिने बताउनुभयो ।
लमजुङमा यही पुस १२ गतेदेखि विविध सांस्कृतिक कार्यक्रमका साथ तमु जातिले ल्होसार पर्व मनाइरहेको छ ।
रासस