ओखलढुंगाको बलखुमा ट्रयाक्टर दुर्घटना, एक जनाको मृत्यु, दुई जना गम्भीर घाइते
प्रकाशित मिति : पुस १४, २०७४ शुक्रबार
पुस १४, ओखलढुंगा जिल्लाको सुनकोसी गाउँपालिका (साबिक बलखु १) ७ मा ट्रयाक्टर दुर्घटनामा परी एकको मृत्यु भएको छ। बिहीबार राति करिब ८ बजेतिर भएको उक्त दुर्घटनामा स्थानीय नवीन लुइँटेलको मृत्यु भएको छ। स्थानीय पुस्कर लुइँटेल र सिन्धुली फिक्कल ६ का झर्के राई गम्भीर घाइते भएका छन्। बलखु भञ्जाङबाट बेसी झर्दै गरेको ना ६ त ४६९८ नम्बरको ट्रयाक्टर ओरालेबाटोमा गति बढी भएका कारण दुर्घटना भएको प्रत्यक्षदर्शी ईश्वरी गिरीले बताए।
घाइतेलाई उपचारका लागि काठमाडौं पठाइएको र मृतकको पोष्टमाटमको लागि जिल्ला सदरमुकाम ओखलढुंगा लगिएको पनि गिरीले जानकारी दिए। ट्रयाक्टर चालक भने फरार रहेको र खोजी कार्य तीव्र बनाइएको प्रहरीले जनाएको छ।