Follow @khasokhasmag

नारायणगढ-मुग्लिन सडकः दुई वर्षमा १३ किलोमिटर पिच


प्रकाशित मिति : मंसिर २८, २०७४ बिहीबार

२८ मंसिर, चितवन । निर्धारीत समय काम नसकेर ३ पटकसम्म म्याद थप गरिएको नारायणगढ-मुग्लिन सडक आयोजनाको करीव १३ किलोमिटर सडक पिच गरिएको छ । आयोजनाले अहिले रामनगर, सोह्र किलो, भालुढुंगा क्षेत्रमा सडक पिचको काम गरिरहेको इन्जिनियर शिव खनालले जानकारी दिए ।

नारायणगढको आँपटारीदेखि मुग्लिनसम्म ३३.२ किलोमिटर दूरी छ । अझै २० किलोमिटर सडक पिच गर्न बाँकी नै छ ।

‘पिच गर्ने गति ठीकै छ, यसमा पनि अत्याधिक ट्राफिक चापका कारणले केही समस्या त निम्तिएकै छ,’ इन्जिनियर खनालले भने, ‘अब चाडपर्व, निर्वाचन सबै सकिएकाले समग्र कामको गति बढाउनुपर्दछ ।’

यो सडक निर्माणमा संलग्न ३ वटै ठेकेदारको म्याद सन् २०१८ को फेव्रुअरी २० मा सकिदै छ । आउने चैतसम्म म्याद थप गर्ने तयारी छ । डेढ महिनाजति म्याद थप गर्ने तर ०७४ पछि म्याद थप नहुने इन्जिनियर खनालले जानकारी दिए ।

गएको असोजसम्म ५० प्रतिशत काम सक्नुपर्ने थियो त्यो काम नसकिएपछि दुई ठेकेदारले आयोजनालाई ७५ लाख रुपैयाँ पेनाल्टी तिरीसकेका छन् । प्रतिदिन ०.०२५ प्रतिशत ठेक्का सम्झौता रकम पेनाल्टी बुझाउँदै आएका छन् ठेकेदारहरुले । अब चैत महिनालाई शतप्रतिशत कामको अवधि राखेर सम्झौता चौथोपटक थप गर्ने सोच आयोजनाको रहेको खनालले बताए ।

‘बैशाखपछि सम्झौता थप हुँदैन, अहिलेको जरीवाना पनि दोब्बर हुन्छ,’ खनालले भने ।

यसअघि ०७२ माघ १९ मा पहिलोपटक, ०७३ मंसिर १६ मा दोस्रोपटक र ०७४ असार १९ मा तेस्रो पटक म्याद थप गरिसकिएको छ ।

सडकखण्डको अझै ८ सय मिटर भूभाग कटिङको काम बाँकी नै छ । बाँकी कटिङको काम कहिलेबाट अगाडि बढाउने भन्ने निर्क्यौल नभएको आयोजनाका इन्जिनियर खनालले जानकारी दिए । ‘आयोजना प्रमुख पनि आउनु भएको छ, अब प्रशासनसँग बसेर छलफल गर्नुपर्दछ,’ इन्जिनियर खनालले भने, ‘सडक नरोकि कटिङको काम अघि बढाउन सकिँदैन, सोही बेला पिचको काम पनि तिव्र बनाउनुपर्दछ ।’

अहिले पिचको अलवा पहिरोले भत्काएको ठाउँमासफा गर्ने, नाली निर्माण गर्ने, सेफ्टीवालहरु लगाउने काम भैरहेको छ । सडकखण्डको १६ किलो भन्ने स्थानमा ३ सय मिटर, घुमाउनेमा २ सय मिटर र चेपाङडाँडामा ३ सय मिटर पहाड काट्न बाँकी नै छ । यी नारायणगढ-मुग्लिन सडकखण्डको सबैभन्दा जोखिमयुक्त स्थान हुन् । ठूलाठूला अग्ला पहाड र कडा चट्टान भएकाले यहाँ काम गर्न जोखिम छ ।

विश्व बैंकको २ अर्ब ९० करोड रुपैयाँ आर्थिक सहयोगमा ०७२ बैशाखबाट यो सडक निर्माणको काम थालिएको थियो । एसियन हाइवे अन्तर्गतको एएचटू खण्ड अन्तर्गत नारायणगढ-मुग्लिन सडकखण्ड पर्दछ । चीन हुँदै नेपालको कोदारी, काठमाडौं, नागढुंगा-नौबिसे, मुग्लिन-नारायणगढ, हेटौंडा र वीरगञ्जबाट भारतको मुजफ्फरपुर हुँदै जाने यो सडक एसियन हाइवेको एक खण्ड हो ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com